Por Sali Berisha nuk ka faj.
Në shtator 2021 kur ai u rebelua, ai gënjeu, por ata (shumica e demokratëve) e besuan gënjeshtrën, sepse iu pëlqeu si ai gënjen. Aaaa, thoshin, i madh, ku i gjen, si i shpik (rrenat).
Berisha shpifi, por atyre iu pëlqeu si shpifte. Aaaaa, thoshin, artist është, për regjisor hollivudi, ku i shkon mendja.
Iu dukej alamet argëtimi.
Sali Berisha akuzoi pa limit e pa moral secilin person që i doli para dhe i tha se rruga jote është rruga e katastrofës afatgjatë. E atyre, shumicës, iu pëlqeu ai imoralitet, iu pëlqeu ajo çthurje mendore, prandaj edhe i thonin, doktor mposhti, spastroji, dëboji, tradhëtarët dhe të shiturit.
Berisha është frojdjan, ua ushqeu instiktet për dhunë e poshtërim të tjetrit, ua kënaqi atë dëshirën perverse për të fyer bashkëpartiakët që mendojnë ndryshe. Ua thjeshtëzoi shpjegimin për ngjarjet; jemi unë dhe ju, dhe përballë janë armiqtë, tradhëtarët, të shiturit, janë ata që prej radhëve tona të cilët i shërbejnë armikut. Dhe i mobilizoi qelizat e “shumicës” demokrate që të kthehen në antitrupa e ta mbysin “virusin”, trupin e huaj.
Dario Fabbri në një prononcim deklaroi se nuk është Trump që ka krijuar atë Amerikën, është Amerika që ka krijuar Trumpin, e nuk është Putini që e ka krijuar Rusinë, është Rusia që e ka krijuar Putinin. Edhe këtu nuk është Sali Berisha që e ka krijuar atë PD, është ajo PD e ajo “shumicë e demokratëve” që e ka krijuar Sali Berishën. Ka krijuar monstrumim e vet, atë që shan, shpif, trillon, gënjen, u kënaq instiktet dhe mban në këmbë botëkuptimet e asaj partize.
Luftën brenda “të djathtës” e ka fituar krahu më ekstremist, e ka fituar “Hamasi” ose “Al-Kaeda” e të djathtës, duke i asgjësuar të gjithë të tjerët, ngjashëm siç Enver Hoxha fitoi luftën kundër fraksioneve social-demokrate ose socialiste, duke triumfuar krahu stalinist. E ka fituar “Hamasi” sepse në thelb ajo është e djathta shqiptare, nuk ka tjetër. Të gjitha ngjyrat dhe botëkuptimet e tjera janë minoranca. Minorancë janë demokratët që besojnë në principet demokratike, minorancë janë nacionalistët, minorancë janë liberalët, minorancë janë të gjithë.
Shumica është solide dhe ruan po atë botëkuptim e atë mentalitet i cili ka shenjë treguese Sali Berishën. Dhe ketë ne e kuptojmë dje dhe sot kur lexojmë disa demokratë të cilët shkruajnë në facebook dhe thonë se Sali Berisha duhet të hapë krahun sepse është i plakur.
Pra ata nuk kanë problem me tipin e tij, me modelin e tij, me vetitë e tij, kanë vetëm problem biologjik me plakjen, askund problem ideor dhe botëkuptimor. Sepse për ta ai është në rregull, thjesht është plakur dhe ska më energji për ta çuar përpara atë mentalitet. Nevojitet dikush më i ri por si Berisha, në rrjedhën e mentalitetit të tij.
Sot që ka mbetur vetëm dhe i braktisur, ai nuk është braktisur për arsye ideore, kulturore e demokratike; është braktisur sepse është plakur. Sepse turma të tilla janë imorale.
Grupimet morale dhe ideore, ose mardhënia e ndërtuar mbi ndershmëri e rregulla politike, funksionon deri në fund, pavarësisht moshës së liderit. Ndërsa mardhëniet imorale dhe perverse midis grupimit dhe liderit, mardhëniet e bazuara te kurimi i frustrimeve ose te ndezja e ëndrrës për plackitje, kapitullojnë kur lideri nuk ka më fuqi psikologjike për ta çuar përpara imoralitetin dhe perversionin; aty ata e braktisin. Prandaj e kanë braktisur edhe ata të cilët e rikthyen dhe e ri-instaluan, sepse nuk ka fuqinë që ata pretendojnë se duhet të kishte, si për tua kuruar frustrimet, si për tua kënaqur instiktet për poshtërim, si për tua ndezur ëndrrën për të vjedhur edhe një herë.
Ky ishte një destinacion i pashmangshëm!
Po çkeni me Berishën mor aman? Dhe nuk ju pëlqen për asgjë,dhe merreni me të. Hajde merre vesh.
Shkruani mirë e bukur për arritjet spektakël të Edi Ramës. Kjo ju nderon