Kërkesa për të marrë urdhër mbrojtjeje është rritur vitet e fundit.
Vetëm për periudhen janar – gusht 2017, nga të dhënat e marra nga Gjykata e Tiranës janë 673 urdhra mbrojtjeje të depozituara, prej të cilave 137 janë pranuar, ndërsa 433 raste janë pushuar nga gjykata.
Sipas avokates Vjollca Pustina, kjo ndodh pasi palët nuk paraqiten në gjykatë pas denoncimit.
“Në fakt urdhrat e mbrojtjes nga viti në vit janë rritur. Rezulton që numri i kallëzimeve të mbërritura në Gjykatë është shumë i lartë dhe marrja e urdhrave të mbrojtjes nga Gjykata me vendim është shumë i vogël. Kjo vjen sepse palët, në rastin konkret i dhunuari dhunuesi nuk paraqiten në Gjykatë dhe kjo e fundit në këto kushte e pushon çështjen,” u shpreh avokatja.
Sipas avokates Pustina, problem mbetet zbatimi i urdhërave të mbrojtjes, pasi numri i inspektorëve të policisë është i vogël përballë popullësisë që ata mbulojnë.
“Një inspektor që mbulon një zonë të caktuar ka nën juridikison rreth 6 mijë deri 22 mijë banorë. A mundet që një inspektor zone të mbulojë e kontrollojë kaq shumë njerëz. Duhet që organet e policisë të punojnë pak më shumë, te ketë të paktën të ketë pak më shumë inspektorë të zonave,”shton Pustina.
Vjollca Pustina sqaron se nevoja për urdhër mbrojtjeje vjen zakonisht si pasojë e maskilizmit të shoqërinë shqiptare, që nuk pranon që hapin e divorcit e ndërmerr gruaja. Vetëm para 2 ditësh gjyqtarja Fildeze Hafizi u ekzektua nga ish bashkëshorti i saj edhe pse kishte një urdhër mbrojtjeje nga gjykata. Ndërkohë që një tjetër grua denoncoi publikisht dhunën nga ish bashkëshorti , duke kërkuar mbrojtje nga institucionet./Shqiptarja
