Cristiano Ronaldo ka marrë disa “nofka” gjatë karrierës së tij në futboll. Mbi të gjitha njihet si CR7, akronim i cili është bërë marka e tij, stampohet në të gjitha produktet e portugezit. Tifozët e tij më të zjarrtë mund ta thërrasin “GOAT” për të përshkruar yllin e preferuar, ndërsa tifozët kritikë të futbollit nganjëherë e sulmojnë me fjalën poshtëruese “Penaldo” (ka shënuar shumë gola me penallti).
Pastaj, nëse jeni mjaft i afërt me të, 36-vjeçari mund t’ju lejojë edhe ta quani “Cris”. Një tjetër pseudonim që përdoret më shpesh nga komentuesit e futbollit është “mbreti” i Champions League. Le të analizojmë më poshtë se pse e ka marrë këtë përcaktim.
Ronaldo njihet nga disa si “Mister Champions League” për shkak të suksesit të tij të pashembullt në këtë kompeticion, si në nivel klubesh, ashtu edhe individual. Ai ka fituar pesë trofe të Ligës së Kampionëve, duke e bërë “sefte” me Manchester United në sezonin 2007-2008, përpara se të vazhdonte të grumbullonte edhe katër të tjerë gjatë kohës te Real Madridi.
Përveçse ka ndihmuar skuadrat për të cilat ka luajtur që ta fitojnë këtë garë në pesë raste, Ronaldo ka thyer rekorde pas rekordesh në Ligën e Kampionëve. Për shembull, ai është në një farë mase golashënuesi më i mirë i të gjitha kohërave në historinë e kompeticionit madhor të klubeve europiane, përpara Lionel Messit.
Gjithashtu ka luajtur më shumë ndeshje në Champions, duke kaluar ish-bashkëlojtarin te Real Madridi, Iker Casillas, në vitin 2021. 17 golat e shënuar nga Ronaldo në edicionin 2013-2014 janë shifra rekord për Ligën e Kampionëve në një sezon të vetëm.
Në epokën moderne, CR7 është i vetmi lojtar që ka shënuar në tri finale të ndryshme të Champions-it (2008, 2014, 2017). Duhet theksuar se Alfred Di Stefano shënoi në pesë finale të Kupës Evropiane, përpara ndryshimit të formatit dhe emrit në vitin 1992.
Para se të largohej nga “Old Trafford” për te Real Madridi, ikona e Portugalisë deklaroi se fitimi i Ligës së Kampionëve ishte “pika më e lartë” në karrierën e tij dhe, siç dëshmon lista e lartpërmendur e rekordeve, ai me siguri ka shkëlqyer në këtë kompeticion qysh atëherë.
Clarence Seedorf u quajt “Zoti i Champions League” shumë përpara se lidhja e dashurisë së Ronaldos me kompeticionin në fjalë të bëhej e njëjta gjë. Seedorf e mori këtë pseudonim për faktin se fitoi Champions me tri ekipe të ndryshme; Ajax, Real Madrid dhe Milan.
Ronaldo ka marrë pjesë në gjashtë finale të Ligës së Kampionëve, duke fituar pesë dhe duke humbur një herë. Triumfi i tij i parë në Ligën e Kampionëve erdhi në sezonin 2007-2008 me Manchester United që mposhti Chelsea në Moskë, por humbi finalen e sezonit të ardhshëm, pasi Barcelona doli fituese në Romë.
Ronaldos iu desh të priste deri në sezonin 2013-2014, kur luante për Real Madridin, që ta fitonte trofeun për herë të dytë, me tre tituj të tjerë të shtuar në “palmares” më 2016, 2017 dhe 2018. Ai ka luajtur mbi 180 ndeshje në Champions, duke shënuar 140 gola.
/a.r
