Polarizimi politik dhe dezinformatat online janë duke kërcënuar programet për vaksina në gjithë botën, andaj besimi publik është i paqëndrueshëm dhe ndryshon nga vendi në vend, është thënë në të dhënat e një studimi rreth besimit që ekziston për vaksina në nivel global.
Studimi, i cili analizon trendet për besimin që ekziston në vaksinë në 149 shtete në periudhën 2015-2019, ka gjetur se skepticizmi për sigurinë e vaksinave ka pasur tendencë të rritet, bashkë me mungesën e stabilitetit dhe ekstremizimit fetar, transmeton agjencia e lajmeve, Reuters.
“Është tejet e rëndësishme që kur ka sëmundje të reja dhe kërcënime sikurse pandemia me koronavirus, ne të vëzhgojmë rregullisht sjelljen publike. Perceptimet për vaksina janë shumë më të paqëndrueshme sesa kanë qenë dikur. Megjithatë, ekziston besim i madh në botë për vaksinat. Mirëpo mos e konsideroni të sigurt këtë gjë. Besimi rritet dhe bie, është shumë i paqëndrueshëm”, ka thënë Heidi Larson, profesoreshë në shkollën e Londrës për Higjienë dhe Mjekësi Tropikale, që ka drejtuar studimin.
I publikuar nga revista mjekësore, Lancet, gjetjet janë të bazuara në të dhënat e më shumë se 284,000 të rinjve, të cilët janë pyetur më 2019 nëse i konsiderojnë vaksinat të rëndësishme, të sigurta dhe efektive.
Larson ka thënë se ndërkohë që prodhuesit e ilaçeve dhe hulumtuesit janë duke bërë garë për zhvillim të vaksinave kundër sëmundjes COVID-19, që shkakton koronavirusi, qeveritë duhet të jenë shumë më vigjilente kur i qasen besimit publik për vaksinat si dhe kur kthejnë përgjigje të shpejta për shqetësimet.
“Ekziston shumë ankth për shpejtësinë e zhvillimit të vaksinës (për COVID-19). Mirëpo, publiku nuk është shumë i interesuar në shpejtësi – është më i interesuar në efektivitet dhe siguri”, ka thënë ajo.
Rezultatet e studimit tregojnë se besimi në vaksina në Evropë është i ulët në krahasim me rajone tjera në botë sikurse Afrika, pasi proporcioni i personave që pajtohen se vaksinat janë të sigurta dallon nga rreth 19 për qind në Lituani, deri në 66 për qind në Finlandë.
Iraku, Liberia dhe Senegali kanë pasur shkallën më të lartë të respodentëve që më 2019 janë pajtuar se vaksinat janë të rëndësishme.
Mirëpo, besimi publik në vaksina është rritur në disa shtete evropiane nga viti 2015, përfshirë Francën, Italinë, Irlandën dhe Britaninë.
Ky studim ka gjetur gjashtë shtete ku besimi në vaksina ka rënë dukshëm nga viti 2015.
Në Indonezi, Pakistan, Serbi, Azerbajxhan, Afganistan dhe Nigeri, është rritur dukshëm propocioni i njerëzve që nuk pajtohen aspak se vaksinat janë të sigurta.
Larson ka thënë se kjo gjë është e lidhur me trendet e mungesës së stabilitetit politik dhe ekstremizmit fetar në këto shtete.
“Në këto shtete, ka më shumë polarizim të ndjenjave. Më shumë njerëz janë duke iu bashkëngjitur ekstremeve ‘të mospajtimit të thellë’, apo ‘dakordimit të fuqishëm’”, ka thënë ajo.
Indonezia ka përjetuar rënie të madhe të besimit publik në periudhën 2015/19, e nxitur pjesërisht nga liderët myslimanë që kanë vënë në pikëpyetje një varg sëmundjesh si fruthi dhe rubeola, apo nga mjekët popullorë që promovojnë alternativa natyrale për shërim./ REL
