Nga Ardit Rada
Bujar Nishani është bërë sërish protragonist i ekraneve mëngjesin e së hënës duke pasuar daljen e tij të djeshme publike, një prezencë e pazakontë për të dy ditë rresht në televizor. Sot, fokusi i takimit të Nishanit me dhjetoristët dhe figura të tjera kryesisht pranë PD, ishte ngjarja e 8 Dhjetorit, atë që ish-kryeministri Berisha e shpalli festë kombëtare dhe pushim zyrtar.
Pikëçuditësja e aktivitetit të sotëm qëndron në faktin se Presidenti e përkujton datën 8 më datë 7, pra një ditë më parë. Do të dukej krejt e natyrshme sikur e hëna të mos pasohej një ditë më pas nga protesta e opozitës. Në fakt, Nishani sot duke përkujtuar aktorë e faktorë të 25 viteve më parë hodhi deklarata konkrete për grumbullim, organizim dhe rizgjim shpresash (?!). Studentët dhe dekanët e universiteteve të ndryshme dëgjuan sot këshillat për të pasur të njejtën ëndërr si dikur: E duam Shqipërinë si gjithë Europa!
Në ligjëratën e kreut të shtetit, të njohur për shërbimet që i bën partisë ku aderon pavarësisht petkut të ‘mbi palëve’ që i jep detyra, mesazhet për t’u ngritur në protestë ishin të qarta. Kjo është edhe arsyeja pse Presidenti ‘e përkujton’ këtë ngjarje një ditë më parë protestës dhe datë së shënuar, duke kërkuar të kthehet shpresa dhe besimi për ta parë Shqipërinë një orë e më parë në Bashkimin Evropian përmes ngritjes së zërit.
Siç ka ndodhur dhe më parë, presidenti paraqitet me mesazhe aspak të kamufluara që më shumë sesa ‘mbi palët’ jep idenë e Ghandit të demokratëve duke mos kërcënuar me dhunë si krerët e partisë së tij, por duke dhënë një dorë gjithësesi.
