Nga Flogert Muça/
Kryetari i PD-së, njëherësh shef i opozitës në Shqipëri, Lulzim Basha, ka thirrur një protestë. “Protesta është kundër varfërisë, korrupsionit dhe për t’i kthyer dinjtitetin Shqipërisë duke rrëzuar qeverinë “Rama”, është kauza që Basha ka ngritur për të ftuar edhe qytetarët t’i bashkohen. Duhet mirëkuptuar kjo lëvizje e Bashës. Në momente kritike kur të shpërthën në “familje”, duhet të flasësh e çorientosh opinionin publik duke akuzuar “familjet” e tjera që të mos dalë nami i keq. Kjo ndodh sepse Basha ka një pengesë jo për protestën, por për njeriun politik që ai përfaqëson.
Është protesta në ditën simbolike të dhjetoristëve të 91’-shit, në 8 dhjetor. Është datë e cila në fakt duhet të na ngrejë të gjithëve në protestë ndaj gjithë kalsës politike që për 25 vjet vetëm sa e ka djegur Shqipërinë dhe ka pasuruar disa familje. Por, a është kjo protestë e Bashës ndaj qeverisë “Rama”? Apo është kjo protestë ndaj disa “Dhjetoristëve” në PD të cilët e konsiderojnë Bashën si pa vizion dhe jo frymëzues? A po tenton Basha të ndjekë gjurmët e Berishës? A është kjo një protestë që Basha po e bën për t’u treguar dhëmbët të tijëve dhe për tu konfirmuar? Edhe sa “protesta” duhet të bëhen që të konfirmohet Basha? Më kë e ka këtë radhë ai “sherrin” dhe sa i rrezikohet Ramës pushteti?
Si këto pyetje mund të shtrojmë shumë, por përgjigjen e gjejmë nëse analizojmë Bashën si njeri politik. Bashkë me Bashën duhen parë edhe të dhënat empirike sa i përket protestave reale opozitare dhe faktit se “a ka alterantivë për shqiptarët Basha, a ka model?”. Nëse e nisim më Bashën, problemi i tij nuk është askush veç vetes. Me këtë nuk po themi që Basha nuk është “djalë i mirë”, por për sa kohë po e shohim në këndvështrimin politik detyrohemi të bëjmë një panoramë politike mbi të. Është Basha që për “Rrugën e Kombit” akuzohet se i “avulluan” sy për sy plot 230 milionë Euro. Thuhet se i iku hetimit me raporte mjekësore. Pas kësaj vjen “Pakti Detar” me Greqinë, ku si ministër i Jashtëm i fali Greqisë 300 kilometra katrorë det, por që Kushtetuesja fatmirësisht e hodhi poshtë. Në vrasjet e 21-janarit, ai ishte ministri i Brendshëm, 4 viktima mbetën në Bulevard. Dhe pas gjithë këtij pushteti në 3 ministri, Bashës ju dha edhe Bashkia Tiranë, me anë të numërimit të 8 majit nga kryetari i KQZ që më pas u bë deputet i PD-së. Dhe e mbylli duke humbur Tiranën dhe duke mbajtur vetëm dhuratën e tij të fundit, Partinë Demokratike. A është ky imazhi që i duhet një shefi opozite? Qoftë larg, larg këtij imazhi duhet të qëndrojë edhe diktatori për sa kohë është në vorbullën e politikës.
Sigurisht që këto janë kostot që Lulzim Basha mban mbi kurriz nga prezenca në politikë në kaq pak vite, krahasuar me eksponetët e tjerë në PD (përjashtuar Berishën). E të gjitha këto janë vërtetë shumë për të pretenduar të bëhesh kryeministër. Aq më pak kur në dy zgjedhjet e fundit koalicioni i majtë ka mundur të mbajë një numër të frikshëm votash pro. Ky është treguesi që kjo qeveri dhe pse me gabimee mosrealizime, ka ecur kah premtimeve që dha në 2013-tën, për sa kohë shqiptarët i dhanë të njëjtën numër votash në 2015-tën. Sigurisht, fakti që kishte Bashën si shef opozite me gjithë barrën e bëmave që thamë ma lart, ka ndihmuar koalicionin e majtë të mbajë nurmin e votave të pandryshuar në 2 vite.
E megjithë këtë krahasim dhe kostot që Basha mbart mbi supe, ai sërisht thërret protestë. Pse? Ai nuk ka asnjë pretendim që mund të rrëzojë qeverinë. Atëherë pse thirr protestë?
Sepse ai luftën nuk e ka me Edi Ramën, por me të tijët. Është kryetari që nuk e do Partia Demokratike. Kjo jo vetëm se “nuk ka vizion” siç u shpreh Dhjetoristi Eduart Selami pak ditë më parë, por është një përbërje politike që ka perënduar dhe ka konsumuar çdo lloj mëkati në një kohë rekord. 3 herë ministër, 3 bëma antikombëtare. Kryetar bashkie që nuk u përfol për asnjë centimetër rrugë a punë publike. E tani kryetar partie që nuk e do partia, që nuk frymëzon, që nuk ka vizion dhe që ka një imazh copë e çikë. Në fakt nuk është se pakënaqësia ndaj tij ka filluar sot, por mesa duket ky është fillimi i fundit.
Fakti që ai ka zgjedhur të protestojë në 8 dhjetor ka domethënien e plotë. Ai po proteston për t’i treguar dhëmbët të gjithë atyre që janë kritikë ndaj tij. Fakti që Basha nuk ka asnjë platfomë apo model që mund t’ju propozojë shqiptarëve do të thotë se në fakt s’ka asgjë me Edi Ramën, por me të gjithë ata që e quajnë “jovizionar” . Kjo filozofi inponuese që po ndjek Basha për t’ju thënë të tijëve “Ja sa anëtarë të PD-së më suportojnë”, është një luftë që mund të jetë e shëndetshme për opozitën dhe riorganizimin brenda saj që po nis me zërat kundër Bashës, por jo për masën. Lufta që Basha i ka hapur deputetëve të tij që mendojnë se ai nuk ka staturën e duhur për të drejtuar është ndoshta grama e fundit para se PD-ja të bëjë risktukturimin e saj real. Deri atëherë nuk do të kemi opozitë, e kjo është vërtetë e dëmshme për demokracinë.
/Lexo.al
