Nga Artur Ajazi
Partia Demokratike (e pabashkuar) pas lirimit nga arresti i Sali Berishës, nuk e di pse, por ka nisur të merret më shumë me “bandat e PS-së”. Një melodi bajate që dëgjohet prej 2013 nga Berisha dhe të vetët. Natyrisht një parti që është themeluesja e bandave qysh nga 1992, 1996, dhe më pas, nuk ka pse mos të merret me të tilla makinacione. Duke nisur nga Berisha, Gaz Bardhi, Muli, dhe duke përfunduar tek mediat e tyre krejt të pabesueshme, po merren me “bandat e socialistëve”.
Padyshim, kjo për të krijuar nesër pas humbjes, alibinë idioteske se “Rama fitoi se e ndihmuan bandat”. Kanë harruar se, fitorja e Edi Ramës, ka ardhur nga vota e shumicës së shqiptareve, dhe jo nga makinacionet që shpik dhe shpif Berisha. I sapoliruar nga arresti shtëpiak, Berishës i duhet një “plan B” të cilin do ta shfrytëzojë edhe gjatë fushatës, edhe pas humbjes. I duhet “skenari me bandat” pasi e di fare mirë se, i mbetur pa aleatë, me anëtarësi të përgjysmuar, dhe pa program bindës, vetëm “propaganda e bandave të socialisteve”, mund ta shpëtojë për ta mbajtur postin e kryetarit të partisë, edhe pas zgjedhjeve të 2025.
Marrja me “bandat”, nuk është e rastësishme. Edhe pse SPAK-un e ka quajtur “SKAP”, Berisha e di fare mirë që politika, nuk duhet të ngatërrohet me punën e organeve të drejtësisë. Britmat, akuzat, intimidimet ndaj prokurorëve, gjyqtarëve, ministrave dhe drejtuesve të tjerë të shtetit, nuk po i japin Berishës “frytet” e pritura. Duke futur “hundët” në punët e drejtësisë, dhe duke mos vajtur asnjëherë dinjitozë në dyert e saj kur kanë akuza konkrete, e kanë neveritur misionin e opozitës. Hapja e dosjeve të vjetra për lidershipin e Partisë Demokratike, gjurmimi i pasurive të paligjshme nga drejtuesit e saj, është shkaku kryesor që Berisha dhe ata që e rrethojnë, po merren me “bandat e socialisteve”.
Sa qesharakë. Dhe kjo për të larguar vëmëndjen nga skandalet e akuzat që rëndojnë edhe sot e kësaj dite për ish-pushtetarët e kësaj opozite. Ata duhet të përgjigjen për bandat e 1996, për bandat e 1997, për Suden, Rrapushin, dhe abuzuesit e tjerë që i grabitën shqiptareve miliona e miliona lekë nën doktrinën famëkeqe të “Piramidave”.
Ato ishin dhe do të mbeten bandat e vërteta të cilat zhvatën dhe masakruan jetën e shqiptareve. Marrja me “bandat e PS”, mbetet propaganda më bajate e Berishës, duke thelluar pabesueshmërinë tek shumica e popullit. Me propogandën e tij, ai dhe pasuesit e tij, duan të bëjnë pis, organet e reja të drejtësisë. Duke u marrë me dosjet, vendimet, dhe punët e drejtësisë, opozita kërkon të largojë vëmëndjen nga apatia dhe paaftësia për të ribashkuar partinë e tyre, dhe për të krijuar skenarin e humbjes së sigurtë në 2025.
