Të enjten në Bruksel u zhvillua Konferenca e 5-të Ndërqeveritare mes Shqipërisë dhe Bashkimit Europian, që miratoi hapjen e negociatave të anëtarësimit me Shqipërinë mbi 8 kapituj të përfshirë në Grupimin e 3-të: “Konkurrueshmëria dhe Rritja Gjithëpërfshirëse”.
Në një lidhje direkte për Klan News me moderatorin Leftion Peristeri, zv.ministrja e Ekonomisë, Olta Manja ka treguar më shumë se çfarë përmban ky grupkapitull.
Manjani tha se çelja e këtij grupkapitulli të tretë të negociatave është një nga më të rëndësishmit pasi prek një sërë reformash dhe ndryshimesh ligjore.
“Grupkapitulli i tretë është në fakt grupkapitulli i katërt, në kontekstin e hapjes së negociatave që nga viti 2022. Është një grupkapitull që përfshin një sërë reformash në sektorë të ndryshëm. Quhet grupkapitulli i Konkurrueshmërisë dhe Rritjes Gjithëpërfshirëse. Prek sektorë shumë qendrorë dhe disa politika që lidhen me politikat industriale, për mënyrat se si do të operojnë bizneset. Politikat fiskale dhe monetare që kanë të bëjnë me taksat, me doganat, apo nga politika monetare që ndiqet nga Banka e Shqipërisë. Politikat e punësimit dhe politikat sociale, paketa dixhitale dhe paketa arsimore, pra që lidhen me gjithë çështjet e edukimit.
Është një ndër kapitujt më të rëndësishëm për shkak se për nga natyra prek një sërë reformash dhe një sërë ndryshimesh ligjore për të përafruar kuadrin shqiptar legjislativ me atë të Bashkimit Europian. Kjo nuk vlen vetëm për këtë grupkapitull, po për të gjithë grupkapitujt e tjerë.
Është një proces sa teknik, është edhe politik. Është shumë e rëndësishme që në kuadër të reformave, procesi cilësohet thjesht si proces teknik”, tha Manjani.
