Kongresi i PS vendosi dje që të pyesë me referendum anëtarësinë e Partisë në lidhje me legjitimitetin e kryetarit.
Duket se pas Kongresit është e qartë pyetja që më 9 prill do t’i bëhet anëtarësisë së PS. “Nëse referendumi do të thotë po, atëherë do të kemi zgjedhje për kryetarin e Partisë Socialiste”, thotë Damian Gjiknuri.
Deputeti socialist, që ka punuar për ndryshimet statutore, e votoi referendumin, edhe pse njësoj si Fatmir Xhafaj, ai beson se mandati i kryetarit nuk vihej në pikëpyetje.
“Nga pikëpamja juridike kjo çështje mbyllet sot për mua si jurist. Pse? Sepse sot Partia Socialiste ka votuar statutin e ri, pra një ka një akt rregullator ku ka parashikuar që në kohën që kryetari i partisë është kryeministër, Kongresi mund të vendosë që të mos ketë zgjedhje për të”, sqaron Gjiknuri.
