Socialistët nuk janë tërhequr nga qëllimi për të pastruar politikën nga ish bashkëpunëtorët e sigurimit të shtetit.
Taulant Balla, kryetari i grupit të deputetëve të PS-së thotë se dy propozimet e tyre do të diskutohen me rinisjen e parlamentit.
TAULANT BALLA
KRYETAR I GRUPIT PARLAMENTAR, PS
Çuarja përpara e propozimeve tona është një detyrim i Kuvendit të Shqipërisë.
Afër vendoreve të 14 majit, ndryshimet e kërkuara nga mazhoranca qeverisëse prekin ligjin e dekriminalizimit dhe të partive politike. Në të parin kërkohet ndalimi i kandidimit dhe shkarkimi nga ushtrimi i funksioneve publike pasi vërtetohet nga Autoriteti i Dosjeve se janë ish bashkëpunëtorë apo të favorizuar të organit famëkeq, sigurimi i shtetit.
Edhe në të dytin, socialistët propozojnë ndalimin dhe shkarkimin e kryetarëve të partive politike me të shkuar komuniste.
TAULANT BALLA
KRYETAR I GRUPIT PARLAMENTAR, PS
Koha është e mjaftueshme që të pamundësojmë që personat të cilët kanë qenë bashkëpunëtorë të ish sigurimit të shtetit të zgjidhen qoftë në organet e pushtetit vendor, ku bëhet fjalë për zgjedhjet e 14 majit, qoftë në pushtetin legjislativ, ekzekutiv apo në pozicione të tjera.
Miratimi i tyre kërkon 84 vota, të cilat Partia Socialiste nuk i ka. Ajo shpreson t’i gjejë te grupi i deputetëve mbështetës të ish kryetarit të PD-së, Lulzim Basha.
TAULANT BALLA
KRYETAR I GRUPIT PARLAMENTAR, PS
Sikurse kemi arritur të gjejmë gjuhën e përbashkët në ndryshimet që kaluam gjatë sesionit të tretë, për sa i përket ndryshimet në ligjin për Autoritetin e Informimit mbi Dosjet e ish Sigurimit të Shtetit. Besoj do të gjejmë gjuhën e përbashkët duke rikujtuar që ne kemi pranuar edhe disa ndryshime të opozitës të cilat lidheshin më çështje që adresohen në ligjin për informacionin e klasifikuar në Republikën e Shqipërisë.
Propozimet ligjore nga socialistët për t’i hequr të drejtën e kandidimit apo drejtimin e një partie politike nëse vërtetohet lidhja me ish-sigurimin e shtetit, erdhën pas dyshimit se Ilir Meta është ish bashkëpunëtor i organit famëkeq të spiunimit.
Në korrikun e 2022-it, një ditë pasi Ilir Meta nuk ishte më president, Autoriteteve i Dosjeve zbuloi se një politikan i nivelit të lartë me inicialet I.M dyshohet të jetë një ish bashkëpunëtor i sigurimit të shtetit. Akuza është mohuar nga kryetari i Partisë së Lirisë ndërsa për Taulant Ballën është ai dhe disa të tjerë.
TAULANT BALLA
KRYETAR I GRUPIT PARLAMENTAR, PS
Nuk mendoj që i vetmi bashkëpunëtor i ish sigurimit të shtetit në politikën aktive shqiptare është vetëm Ilir Meta. Mendoj që duhet të jenë më shumë.
/a.r
