E PËRDITËSUAR
Manastirliu: Spitale dhe qendra të reja
Ministrja e Shëndetësisë premtoi se në mandatin e dytë do të ndërtohen spitale dhe qendra shëndetësore.
“Në mandatin e dytë do të rrisim financimet për shërbimet shëndetësore falas.
Programi garanton që cdo shqiptar të marrë shërbim në kohë dhe me cilësi.
Urgjenca kombëtare është një sistem i ngritur do ta fuqizojmë me burime njerëzore.
Do të ndërtojmë një qendër të re spitalore, 10 qendra të reja shëndetësore.
Do të ndërtojmë një spital të ri për Kirurgjinë dhe një për sëmundjet e brendshme” deklaroi ministrja.
Xhaçka: Do të dyfishojmë buxhetin e ndihmës ekonomike
Ministrja e Mirëqenies Sociale, Olta Xhaçka tha se në mandatin tjetër do të dyfishojmë buxhetin e ndihmës ekonomike.
“Në cdo bashki do të jetë dikush që të ndihmojë fëmijët që të integrohen dhe të rikthehen në shkollë, ata që e kanë braktisur.
100% e fëmijëve romë dhe egjiptianë do të arsimohen. Alternativa për strehim për sa më shumë familje në nevojë.
Në mandatin tjetër do të jenë prioritet, do të nxisim punësimin e të rinjve.
Nga 7-10 mijë lekë shpërblime për pensionistët në fund të vitit” deklaroi ajo.
Ekonomi: Do të rrisim konkurrueshmërinë në turizëm
Ndërsa ministrja e Ekonomisë, Ekonomi deklaroi se “Numri i turistëve u rrit në 1.5 mln në krahasim me 2013.
Do të nxisim formalizimin e këtij sektori dhe do ta bëjmë më të konkurrueshëm dhe do të shtojmë investitorët e huaj. Kontrata 1 euro për bizneset.
Investimet e huaja u rritën me 9%, mandatin tjetër synojmë dyfishim, do të mbështesim teknologjinë e informacionit për modernizimin e bizneseve.
100 shkolla më shumë në Shqipëri” tha ajo.
Arben Ahmetaj: Do të rrisim pagat me 40%, paga minimale 30 mijë lekë
Ministri i Financave deklaroi se kjo qeveri nuk ka keqmenaxhuar financat, ndërsa garantoi uljen e borxhit publik në mandatin e dytë nën 60%.
Ahmetaj deklaroi se ne fund te mandatit tjeter do te rriten pagat me 40%, ndersa paga minimale do te rritet ne 30 mijë lekë.
“220 mijë vende të reja pune mandatin tjetër. Në fund të mandatit do të kemi rritur pagat me 40% dhe do të rrisim pagën minimale në 30 mijë lekë.
Politikat fiskale do të lehtësojnë ngarkesën për qytetarët. Do të vazhdojmë lehtësitë fiskale, do të tërheqim kompanitë prestigjoze nga rajoni dhe nga bota.
Do të ofrojmë ndihmë për familjet e reja” deklaroi ai.
Erjon Braçe: 220 mijë vende pune për mandatin tjetër
Kongresin e ka hapur deputeti Erjon Braçe, i cili në fjalën e tij theksoi se ndërtimi i Shqipërisë fillon nga Reforma në Drejtësi.
“Shqipëria që kemi sot është një vend pa drejtësi. Reforma në drejtësi është rruga për të ndërtuar një Shqipëri më të drejtë për të gjithë qytetarët.
Drejtësia për të hequr imunitetin e të paprekshmit për të garantuar një ekonomi të hapur dhe konkurruese.
Betejë kundër krimit, drogës dhe sekuestrimit të pasurisë së paligjshme për të shpërblyer viktimat e këtij aktiviteti kriminal.
Shteti i drejtë, si një kontratë e ligjshme, qeverisje të përmbajtur. Shanset të barabarta në ekonomi dhe ndihmë familjeve në nevojë.
220 mijë vende pune është angazhimi ynë që del nga ky kongres. Ne do të luftojmë për cdo vend pune për të rinjtë.
183 mijë vende të reja punë në 4 vite dhe në fund të mandatit tjetër me 220 mijë vende të reja pune do të ulim papunësinë në nivelin njëshifror” deklaroi ai.
***
Partia Socialiste ka nisur sot zyrtarisht fushatën elektorale nga qyteti i Durrësit. Në Kongresin e sotëm të PS pritet të prezantohen kandidatët. Aktiviteti zhvillohet në pallatin e sportit “Ramazan Njala”. Kongresi i PS ishte parashikuar që të mblidhej më 29 prill, por u shty për shkak të krizës politike.
Por data 9 Maj është caktuar qëllimisht si dita kur do të mblidhet Kongresi, pasi përkon me ditën kur çelet zyrtarisht fushata elektorale për të gjitha partitë politike.
Përveç kandidatëve të rinj, edhe deputetët e larguar kanë konfirmuar pjesëmarrjen në Kongres dhe se do të vijojnë të japin kontributin e tyre për fitoren e PS. Pas Kongresit, deputetët aktualë, ministrat dhe kandidatët e rinj për deputetë do të dalin në terren për t’u takuar me qytetarët dhe strukturat, për të mbledhur sa më shumë vota për 18 qershorin. /b.d
