Ndryshimi i rregullores së Kuvendit që i përjashton deputetët deri në 60 ditë, për opozitën është një provokim i rëndë, por që kurrsesi nuk do e zbeh aksionin opozitar. Madje, këtij përshkallëzimi, siç Gazment Bardhi e quan, opozita do i përgjigjet me të njëjtën monedhë.
“Pa njoftuar deputetët e opozitës për të marrë pjesë disa ndryshime që de facto pezullojnë mandatin e deputetëve të opozitës për 2 muaj, në vend që të reflektojnë dhe t’i përgjigjen pozitivisht ftesës së ndërkombëtarëve për normalizim, po kryen çdo akt për ta thelluar situatën jo normale dhe bllokimin e punës në Kuvendin e Shqipërisë.
Jo vetëm për të qëndruar në aksionin që kemi nisur, por për t’iu përgjigjur përshkallëzimit të mazhorancën me përshkallëzim të aksionit tonë. E papranueshme që një shumicë të ndërmarrë masa që i heq mandatin përfaqësuesve të opozitës. Provokim i rëndë dhe tregon fytyrën e regjimit”, tha Bardhi.
Ky reagim vjen pasi Këshilli i Rregullores dhe Mandateve miratoi ditën e sotme ndryshimet e Partisë Socialiste për rregulloren e Kuvendit. Që do të thotë se tashmë dënimet për një deputet që shkel rregulloren e Parlamentin do të jenë jo më 10 ditë maksimumi, por nga 30-60 ditë përjashtim.
Këto ndryshime, hyjnë në fuqi pasi të miratohen në seancën e së enjtes, ku mjafton 71 vota, të cilat mazhoranca i ka. Në mbledhjen e sotme, kanë qenë vetëm anëtarët e PS-së.
/a.r
