Përfaqësuesi i Lëvizjes Socialiste për Integrim në KQZ, Altin Kaziaj, reagoi në një deklaratë për mediat mbi pretendimet e ngritura nga Partia Demokratike se Lëvizja Socialiste për Integrim dhe Partia Socialiste po bllokojnë procesin e votimit në Vorë dhe nuk po respektojnë vendimin e KAS. Sipas tij procesi po vijon normalisht në të gjitha qendrat e votimit, përsa kohë është arritur kuorumi i nevojshëm.
“Procesi ka vijuar normalisht pavarësisht pretendimeve të PD. Ligjvënësi ka parashikuar qartë natyrat përkatëse lidhur me një proces zgjedhor, ashtu si edhe personat që ngarkohen për qendrat e votimit, duhet të jenë persona që duhet të jenë banorë të bashkisë përkatëse. Kjo vështirësi është sqaruar dje, dhe përmes komisionerit janë përcaktuar persona të tjerë në këto 22 qendra.
Në 22 qendrat e votimit në Bashkinë Vorë janë caktuar persona të tjera duke qenë se PD nuk ka pasur emrat për të caktuar në këto qendra. Kodi Zgjedhor është shumë i qartë kur arrihet kuorumi, me 5 anëtarë apo me 4 nuk mund të ndalet procesi zgjedhor.
Një shqetësim tjetër është ai i operatorëve të PEIT, janë persona të jashtëm partive, të kontraktuar nga KQZ dhe kanë detyrim personal për të qene në qendrën e votimit që procesi teknik të vijojë normalisht duke u marrë me problematikat që mund të hasem. Dhe nuk ka lidhje kjo me cështje të karakterit politik të një subjekti politik.
Ngritja e një pretendimi të tillë nga PD është i pabazuar. Në 44 qendrat e votimit në Vorë procesi po vijon normalisht, pavarësisht deklaratave publike që po bëhen me qëllim minimin e provesit në vetvete.
Duke qenë se që një subjekt zgjedhor nuk gjen dot persona që t’i ngarkojë me detyra zgjedhore ditën e votimit nuk është as faji i subjekteve të tjera zgjedhore as Komisioni Qëndror i Zgjedhjeve që ka dhënë orientimin dhe anëtarët e QV kanë marrë orientim për të vijuar procesin” tha ai, ndërsa theksoi se nuk ka dije për kallëzimin e dërguar nga PD./m.j
