TIRANE- Në një prononcim për mediat, bashkëkryetari i komisionit parlamentar të reformës zgjedhore, Bledi Çuçi ka thënë se opozita ka bojkotuar reformën zgjedhore, ndërsa mazhoranca do prezantojë javën e ardhshme draftin e saj për këtë reformë.
Bledi Çuçi u shpreh se drafti përfshin kërkesat dhe rekomandimet e bëra për reformën zgjedhore.
“Normalisht që opozita është në bojkot, nuk ka ardhur. Ka braktisur edhe komisionin për reformën zgjedhore, megjithatë ekspertët e maxhorancës dhe ekspertët e kontraktuar nga ambasada gjermane për draftimin e amendimeve që adresojnë rekomandimet e OSBE/ODIHR jnë duke punuar. Javën tjetër do kemi një draft të cilin do ta bëjmë publik, do ua përcjellim edhe partive të tjera, Shoqërisë Civile, një draft që pasqyuron rekomandimet e OSBE/ODIHR. Ne po ecim me të gjithë paketën që adreson rekomandimet e OSBE/ODIHR. Shpresoj që edhe opozita të vijë dhe të bëhet pjesë e këtij procesi deri në fund. Ne si maxhorancë do kryejmë detyrimet tona dhe përgjegjësinë tonë që kemi përpara shqiptarëve. Reforma nuk ka vdekur, ende.”– ka thënë Çuçi.
Në datën 8 tetor, PS pritet të bëjë publike amendimet e saj në Kodin Zgjedhor, të hartuar nga ekspertët e selisë rozë. Megjithatë, ky draft nuk mund të kalojë pa konsensusin dhe votat e opozitës. Në grupin e ekspertëve të PS po punon edhe ish-deputeti demokrat, Viktor Gumi. Një nga pikat interesante të draftit pritet të jetë identifikimi elektronik i votuesve por edhe mundësia e votimit elektronik në zgjedhjet vendore të qershorit 2019.
a.ç
