Ish-Presidenti Ilir Meta në orën 11:30 në Gjykatën e Posaçme Kundër Korrupsionit dhe Krimit të Organizuar do të kërkojë lehtësimin e masës së sigurisë “arrest me burg”.
Sipas burimeve të tvklan.al, nga hetimet e SPAK-ut, mësohet se është zbuluar një rast tjetër korrupsioni që lidhet me ish-çiftin Meta-Kryemadhi.
Bëhet fjalë për një kartë tjetër bankare, e cila dyshohet se është përdorur për blerje dhe shpenzime të dyshimta.
Po sipas burimeve, kjo kartë bankare i është dhënë në dispozicion Kryemadhit dhe Metës nga një biznesmen. Në hetimet e mëparshme ishte zbuluar një kartë tjetër “American Express” që gjithashtu përdorej dhe mbahej nga i njëjti biznesmen.
Gjithashtu, sipas burimeve, SPAK pritet të saktësojë akuzën për lobim në SHBA ndaj Metës, pasi nga letrat e porositura janë zbuluar të dhëna të reja mbi pagesat dhe kontratën.
Erion Çela do të jetë gjyqtari i cili do të marrë vendimin mbi këtë kërkesë në të cilën janë paraqitur argumentet e mbrojtjes. Meta i është drejtuar më herët GJKKO-së edhe me argumentin se është kreu i partisë së dytë opozitare në vend dhe duhet të ushtrojë aktivitetin e tij politik.
Ilir Meta u arrestua më 21 tetor të vitit të shkuar, nën dyshimet se ka kryer korrupsion, mosdeklarim të ardhurash e pastrim parash së bashku me ish-gruan e tij, Monika Kryemadhi.
