Presidenti Ilir Meta ka pritur në kopshtin e Presidencës disa fëmijë dhe përfaqësues të shoqërisë civile. Ata i dorëzuan kreut të shtetit një peticion të quajtur “Jepni llogari për fëmijët”.
Shoqëria Civile nën sloganin ‘Jepni llogari për fëmijët’ ka zhvilluar një marshim protestë me pankarta në duar të nisur nga Reja për të vijuar më pas drejt Kryeministrisë ku në shenjë proteste janë vendosur 140 kartonë të kuq, ndërsa më pas janë zhvendosur drejt Presidencës, ku janë pritur nga Ilir Meta dhe i kanë dorëzuar peticionin.
“Këtë peticion do ta lexoj me mjaft vëmendje dhe besoj se dhe raporti i fundit për vitin 2018 i “Save the Children” është një kambanë alarmi për të gjithë ne, institucionet shtetërore, shoqërinë civile në vendin tonë, mediat dhe familjet shqiptare që t’i adresojmë këto problematika mjaft serioze. Të gjithë së bashku duke i njohur këto probleme, jo duke i fshehur apo anashkaluar, me përgjegjshmëri të angazhohemi dhe t’i vendosim në rrugën e një përmirësimi të qëndrueshëm dhe afatgjatë”, tha kreu i shtetit.
Më pas shoqëria civile vijoi me një marshim për të drejtat e fëmijëve.
a.ç
