Ish-kreu i Shërbimit Informativ Shtetëror, Fatos Klosi ka komentuar situatën politike në vend. Gjatë një interviste për gazetën “SOT”, zoti Klosi e cilësoi protestën e mbajtur dy ditë më parë para Kryeministrisë nga opozita e udhëhequr nga ish-kryeministri Sali Berisha dhe ish-presidenti Ilir Meta si dështim.
Sipas tij, një arsye që qytetarët braktisën Metën dhe Berishën është fakti se ata janë politikanë të lodhur e sprovuar. Ndërkohë duke komentuar intervistën e dhënë për një media shqiptare nga njëri prej protagonistëve të firmës së demontimit në Gërdec, David Packouz, që tregoi me gisht Shkëlzen Berishën si të përfshirë në negociata për çmimin e fishekëve, zoti Klosi e sheh si shumë të rëndë.
Madje, ish-shef i SHISH, Fatos Klosi theksoi se Shkëlzen Berisha del se ka qenë ndërmjetës në aferën e “Gërdecit” dhe për këtë arsye ai kërkoi që SPAK të hetojë këtë tragjedi.
-Zoti Klosi, opozita e udhëhequr nga ish-kryeministri Sali Berisha dhe kreu i partisë së Lirisë, Ilir Meta mbajtën një protestë para Kryeministrisë. Si e patë protestën që u zhvillua dy ditë më parë nga opozita?
Një protestë normale si gjithë të tjerat. U lexuan disa hartime, sepse ashtu ishin të gjitha nga njerëz të ndryshëm edhe mbaroi. Janë protesta që bëhen jo për të rrëzuar qeverinë sepse kjo është absurde, sepse nuk rrëzohet qeveria me protesta, por ai e ka të domosdoshme për të mbajtur me shpresë militantët e vet, mua më pëlqeu se në ato momente që u zhvillua protesta Kryeministri ishte duke riparuar një vazo.
-Po pjesëmarrja në protestë si ju duk?
Pjesëmarrja nuk është se tregon ndonjë gjë të madhe. Kur isha me LSI kemi organizuar protesta dhe kjo tregon sesa kanë punuar ata që e kanë organizuar, diferenca midis pjesëmarrësve në protestën më të mirë dhe atyre që duhen për të realizuar atë që thotë ai për të përmbysur qeverinë është e madhe. Nëse në protestën më të mirë mund të jenë 30 mijë vetë, por të fituar zgjedhjet duhen akoma më shumë.
-Sali Berisha ka deklaruar se ditën e hënë, pra sot do të dal para Parlamentit, ndërsa ka thirrur sërish qytetarët në protestë. Keni një koment lidhur me këtë “Kushtrim” të radhës?
Edhe mund të dal nuk ka ndonjë çudi, nëse do dal do pengojë seancën kaq, por seanca Parlamenti ka plot, nuk është kjo mënyra për të ardhur në pushtet, ndërkohë ai ka probleme të tjera që janë probleme personale. Këto bëhen që të vijë në pushtet Berisha dhe Meta, opozita mbase do vijnë një ditë në pushtet se nuk do jetë PS në pushtet, por atëherë kur të mos jetë në opozitë as Berisha dhe as Meta. Ata kanë qenë në pushtet për shumë vite dhe ja ku jemi, nëse ata do kishin qenë të pushtetarë të suksesshëm do ishim më mirë se jemi. Këtij vendi i duhen njerëz të rinj, por jo ata të dy.
-Sa i përket çështjes së “Gërdecit”, pak ditë më parë në SPAK u thirr djali i ish-kryeministrit Sali Berisha, Shkëlzen Berisha. Mendoni se ai mund të jetë i implikuar në këtë çështje?
Unë kam dëgjuar se çfarë është thënë në media dhe dëgjova se pak ditësh zv/presidenti i shoqërisë që ka blerë fishekët nga Gërdeci e ka trajtuar me Shkëlzen Berishën ai ishte një nga personat e rëndësishëm të atij grupi që shisnin fishekë, sigurisht është i implikuar në këtë çështje, pastaj se ca do bëjë SPAK nëse e ka thirrur për të dëshmuar apo si një i akuzuar i mundshëm do parë. Unë do doja që të dal e vërteta, si çdo qytetarë i këtij vendi jo vetëm për Gërdecin, por edhe për të tjera ngjarje.
E vërteta mund të jetë e hidhur për disa njerëz që kanë gabuar, por është mirë që të dalin të gjitha të vërtetat, sepse ata që i fshehin të vërteta fshehin vepra që nuk ia thonë dot këtij populli. Reformën në drejtësi unë kështu e kam konceptuar si një reformë që një nga tre shtyllat e pushtetit demokratik të çoj në zbulimin e të vërtetave që kanë ndodhur në këtë vend dhe të mos ekzistojë më koncepti i pandëshkueshmërisë./m.j
