Deputetja e Partisë Socialiste, Olta Xhaçka thotë se Partia Demokratike po përdor protestën e nisur të shtunën, më 11 shkurt, për të bojkotuar parlamentin dhe reformën ën drejtësi. E ftuar në rubrikën “Opinion” në “News24”, Xhaçka u ka bërë apel deputetëve të opozitës që të kthehen në Kuvend, në mënyrë që të ecet përpara me reformën në drejtësi dhe Vettingun.
Sipas saj, sjellja e opozitës duke bojkotuar komisionet parlamentare, jo vetëm bllokon reformën në drejtësi, por minon edhe zgjedhjet e ardhshme parlamentare.
“Drejtuesit e kësaj protestë po e shfrytëzojnë atë për të bojkotuar parlamentin dhe për të bojkotuar reformën në drejtësi. Në fakt pjesëmarrja në Kuvend dhe reforma në drejtësi janë e vetmja mënyrë për të adresuar problemet që na shqetësojnë”, tha Xhaçka.
Deputetja socialiste thotë se PD dhe qytetarët kanë të drejtën e tyre për të protestuar, por nga ana tjetër thekson se deputetët opozitare nuk duhet të bojkotojnë Kuvendin.
“Duke bojkotuar parlamentin dhe komisionin e reformën, bllokojnë edhe procesin. Bllokohet ecuria e procesit të vettingut. Mendoj se protesta që po zhvillohet sot nuk është vetëm për ato kauzat e thëna në rrugë, por edhe për të bllokuar reformën. E drejta e qytetarëve për të protestuar është e respektuar nga mazhoranca, por nuk ka asnjë lloj mirëkuptimi për atë që po bëjnë opozitarët sot, duke bojkotuar parlamentin. Organizatorët e protestës duhet të jenë në parlament për të përmbushur vullnetin e 98% të shqiptarëve që e duan reformën në drejtësi dhe vettingun”, tha deputetja Xhaçka./a.m.
