Policia e Tiranës njofton se ka shpërndarë dy tubime të paligjshme të zhvilluara ditën e djeshme në rrugën “Abdi Toptani dhe në bulevardin “Dëshmorët e Kombit”, si dhe procedoi 17 persona të identifikuar si organizatorë.
Bëhet fjalë për protestën e shoqatës së transportit si dhe për atë të disa aktivistëve të shoqërisë civile.
Gjatë zhvillimit të tubimeve, në të dy rastet, policia thotë se para se të ndërhynte për të shpërndarë tubimet, u ka bërë thirrje protestuesve që të shpërndaheshin, pasi nuk kishin marrë leje për zhvillimin e tyre.
Gjithashtu, pretendohet se gjatë thirrjeve policia u ka kërkuar protestuesve që të mbajnë distancë sociale nga punonjësit e policisë dhe nga njëri-tjetri, me qëllim parandalimin e infektimit me Covid-19.
Më pas, policia shpërndau protestuesit, duke bërë disa shoqërime dhe ka filluar procedimin penal për katër persona, si organizatorë të tubimit tek Ministria e Infrastrukturës dhe për 13 të tjerë, si organizatorë të tubimit tek bulevardi “Dëshmorët e Kombit”, pasi kanë organizuar dhe protestuar në mënyrë të paligjshme, pa lejen e organeve kompetente.
Materialet për këto ngjarje do t’i kalojnë Prokurorisë së Tiranës, në ngarkim të 17 personave të identifikuar si organizatorë, për veprat penale “Organizim dhe pjesëmarrje në tubime të paligjshme”, “Mosbindja ndaj urdhrit të punonjësit të policisë së rendit publik” dhe “Pengimi i qarkullimit të mjeteve të transportit”.
Policia e Tiranës apelon për qytetarët që të respektojnë distancimin social dhe të përdorin mjetet mbrojtëse në vendet publike, me qëllim parandalimin e përhapjes së Covid-19, ndërsa problematikën apo shqetësimin që kanë ta adresojnë pranë institucioneve dhe organeve kompetente.
g.kosovari
