Kreu i PD-së, Sali Berisha theksoi se protestja e djeshme para kryeministrisë hapi një “mision” të ri të opozitës për demokracinë dhe Shqipërinë.
”Të Tiranës dhe mbarë Shqipërisë që mbushën dje bulevardin Dëshmorët e Kombit, në protestën më të fuqishme paqësore që mbahet mend ndonjëherë. Inauguruam dje me praninë e tyre misionin e ri të opozitës, shpëtimin e demokracisë, familjes shqiptare, e Shqipërisë. Secili pjesëmarrës firmosi dje kontratën me demokracinë, me familjen dhe Shqipërinë për t’u dalë zot gjer në betejën përfundimtare.
Dua t’i falënderoj për përmbajtjen e zemërimit dhe urrejtjes së tyre të pakufishme që kanë ndaj kësaj narkoqeverie. E kuptoj se ai ishte një mundim i veçantë, por kjo është betejë në vazhdim. Ishte inaugurim me rëndësi të jashtëzakonshme dhe mesazhin më të fuqishëm, mesazh përmblidhet me një fjalë të vetme: Largohu!
Jashtë përpjekjeve të makinave propagandistike të Ramës, vuvuzelave të tij se populli nuk ngrihet dhe nuk ka besim te opozita, madje kishte dhe një që e thoshte se populli e do Ramën, ata faktuan se cilat janë ndjenjat e popullit për Ramën, urrejtja e pakufishme, zemërimi. Me këto dy terma mund të përmblidhen ndjenjat e qytetarëve. Kjo betejë për betejë për jetë ose liri nën moton ja të vdesim ja të rrojmë për liri.”, tha Berisha.
