Qytetarët protestues nga Presheva kanë marshuar nga shkolla fillore dhe e mesme në Preshevë drejt sheshit të Dëshmorëve, para godinës së administratës lokale. Ata qëndruan në sheshin kryesor ku dikur qëndronte Lapidari i Dëshmorëve, i hequr me dhunë nga forcat e Xhandarmërisë së Serbisë.
Protestuesit shqiptarë kanë kundërshtuar politikën shtetërore të Qeverisë së Serbisë ndaj shqiptarëve të Luginës së Preshevës. Zëri i tyre është ngritur edhe ndaj qeverisjes lokale në Preshevë, duke kërkuar sqarim prej kryetarit të kësaj komune për dhënien e mirënjohjes kryeministrit serb Aleksandar Vuçiç, raporton Titulli.com.
“Kosovë, Shqipëri duam drejtësi”, “Të shtypur , të harruar”, “Rinisë punë, hajnisë dhunë”, “Vuçiq, një herë fashistë, gjithmonë fashistë”, “Kthe Lapidarin”, janë disa prej kërkesave të protestuesve shqiptarë, të cilët në momentin e raportimit nuk janë në numër shumë të madh. (javanews.al / a.n)
