Analisti Frrok Çupi, në një intervistë për “Special Report” me gazetarin Arlind Isa, tha se propozimi i kryeministrit Edi Rama për formimin e Asociacionit të komunave me shumicë serbe në Kosovë ka marrë afirmimin e Shteteve të Bashkuara të Amerikës, Francës si edhe Gjermanisë.
“Rama edhe vetvetiu, edhe prej iniciativës së tij do ta kishte marrë këtë hap për arsye të Kushtetutës së Shqipërisë. E detyron Kushtetuta ndërkohë e udhëzoi gjithë praktikat që ka zhvilluar Shqipëria në raport me Kosovën sidomos pas viteve ’90. Në të gjithë ngjarjet që ka kaluar Kosova, që në rrënjë të pavarësisë është kërkuar prezenca e qeverisë së shtetit shqiptar. Në këtë rast, duhet qartë që e gjitha është një punë e përbashkët midis Edi Ramës si kryeministër i Shqipërisë, Departamentit të Shtetit dhe kancelarive të Francës dhe Gjermanisë.”, tha Çupi.
Ai përmendi dy standarte me të cilat po sulmohet Rama nga Kurti dhe Vuçiç. I pyetur nga gazetari nëse ka ndonjë dakordim mes Kurtit e Vuçiç, analisti tha se ata po veprojnë në interes të njëri-tjetrit.
“Në rastin konkret janë veprat që janë të përbashkëta. Duket qartë që dëshmojnë se është e njëjta gjë që zhvillohet prej të dyve me të njëjtën mënyrë. Ajo çfarë bën Kurti i intereson Vuçiç dhe e anasjellta. Në njërën anë Kurti po tenton prej kohësh të mbjellë tymnajën e një regjimi serb. Vuçiç është kthyer si regjim në Kosovë. Kurti gjatë gjithë kohës paraqet rrezikun serb. E njëjta gjë ndodh me Vuçiç, i cili është ndodhur shpeshherë para dilemave për të qenë apo jo në krye të shtetit serb, për të ndryshuar apo jo politikat në vend. Ndodhet para presionit të qytetarisë serbe për t’u kthyer drejt Perëndimit.“, shtoi analisti./m.j
