EKSKLUZIVE/ Drejtuesit më të lartë të PD-së mësohet se kanë zgjedhur dhe do të propozojnë një strategji të re për miratimin e Reformës në Drejtësi. Atë të miratimit pjesë- pjesë të saj. Lajmi bëhet i ditur për Javanews, nga burime konfidenciale brenda selisë së PD-së.
Shumë shpejt demokratët do t’u propozojnë partive të tjera parlamentare të mazhorancës, që, miratimit i Reformës në Drejtësi të bëhet në 3 faza. Në fazën e parë të votohen ato pika të draftit të Reformës ku palët nuk kanë kundërshtime. Faza e dytë është që të miratohen ato propozime në të cilat palët kanë dallime, por që nuk janë thelbësore dhe gjetja e gjuhës së konsensusit është më e lehtë.
Dhe në fund, d.m.th në fazën e tretë, të lihen ato pika të projektit të draftit, ku palët kanë dallime të rëndësishme siç është mandati i Kryeprokurorit dhe i korumit të votave për emërimet në sistemin e lartë të drejtësis me 2/3 apo me 3/5.
Në këtë mënyrë, sipas tyre, procesi mund të ecë përpara dhe të mos qëndrojë i bllokuar. Krerët e PD-së arsyetojnë se ndërkohë që palët kalojnë me votim në Kuvend kapituj të projektligjit për sistemin e drejtësis, për të cilat arritja e konsensusit është më e lehtë, paralelisht punohet edhe për fazën e tretë, për gjetjen e zgjidhjeve të pranueshme nga të gjithë faktorët, ku palët kanë qëndrime diametralisht të kundërta.
Sipas tyre, edhe konsensusi më i fundit i dhënë nga PD-ja për miratimin e ngritjes së Byrosë së Hetimit, është shenjë e një përpjekje për të gjetur një zgjidhje që procesi i reformës në drejtësi të dalë nga pika e ngrirjes ku është tani.
Këto propozime mësohet se gjatë ditës së sotme do tu prezantohen edhe drejtuesve më të lartë të PS-së dhe LSI-së në Kuvend, si dhe anëtarëve të komisionit parlamentarë për Reformën në Drejtësi, me qëllim lëvizjen nga vendi të procesit të kësaj reforme.
Demokratët shprehen se deri në pritje të rekomandimeve që do të bëjë Komisioni i Vencias, mbi draftet e dërguara për shqyrtim dhe analizë, si të komisionit të Ekspertëve të Lartë për Reformën në Drejtësi, ashtu edhe të propozimeve oponente që ka depozituar edhe PD-ja dhe LSI-ja pranë këtij komisioni, le të ecet me miratimin e kapitujeve të veçantë, ku palët nuk kanë dallime thelbësore.
(javanews.al) Me. Ar
