Bashkimi Evropian duhet të frenojë emigracionin duke ndaluar aplikimet e refugjatëve në territorin e tij dhe ngritjen e qendrave të aplikimit për azil jashtë bllokut, sipas propozimeve të paraqitura nga ministri austriak i Mbrojtjes, Hans Peter Doskozil.
“Kjo do të shpëtonte jetën e shumë personave dhe do të ndalonte kontrabandën e organizuar të njerëzve”, deklaroi Doskozil në një letër të publikuar sot.
Në qendrat e reja, zyrtarët e Bashkimit Evropian shumë shpejt do të vendosin nëse azilkërkuesit kanë nevojë për mbrojtje.
Drafti propozon Nigerin si vendin e mundshëm, pa përmendur vendet e tjera.
Emigrantët që kalojnë këtë pengesë do të transferohen direkt në vendet e BE-së.
Drafti në mënyrë indirekte mbron një tavan të BE-së për azilkërkuesit, duke deklaruar se çdo vend ka kufijtë e kapacitetit, përtej të cilit integrimi është i pamundur./a.m.
