Agjencia e Trajtimit të Pronave paralelisht me vlerësimin e kompensimit financiar të ish-pronarëve ka nisur punën për trajtimin e dosjeve që janë ende pa vendim. Nga arkiva e ish-AKKP-së janë nxjerrë rreth 15 mijë dosje të mbetura, teksa ka nisur puna për evidentimin e mangësive në dokumentacion si dhe për të dhënë vendimet përfundimtare. Në bazë të ndryshimeve të bëra në ligj, gjatë shqyrtimit të dosjeve do të bëhet dhe kalkulimi i vlerës përfundimtare që mund të përfitojë një subjekt. Kështu, aplikuesit do ti zbriten përfitimet e marra më parë në vite, si nëpërmjet ndarjes së tokave prej ish-komisioneve, apo dhe me kompensime në vlerë financiare apo fizike. Megjithatë, në faqen zyrtare të ATP-së tashmë janë publikuar dhe listat e plota me numrat e dosjeve përkatëse.
Ku secili prej subjekteve mund të interesohet se ku ka ngecur procesi. Po ashtu mund të kërkohet dhe marrja e kopje-ve të dokumenteve. “Të gjithë subjektet që kanë një dosje pranë ATP dhe kërkojnë informacion në lidhje me ecurinë e dosjes së tyre mund të dërgojnë kërkese sipas formularëve bashkëlidhur të cilët mund ti printoni dhe dërgoni me postë ose ti plotësoni pranë Agjencisë”, thuhet në njofimin e ATP-së. Përsa u përket dokumenteve të kërkuara për të marrë informacion, ATP kërkon plotësimin e formularit të posaçëm, një fotokopje e kartës së identitetit, kopje vendimi nga ish KKP/AKKP (nëse ka) si dhe dokumente te tjerë që mund të disponojë aplikuesi.
Subjekti plotëson kërkesën me shkrim për informim në lidhje me ecurinë e dosjes pranë Zyrës së Marrëdhënieve me Publikun, në ATP ose e dërgon me postë duke bërë kujdes në të dhënat që vendos dhe paraqitjen e dokumenteve te kërkuar. Teksa përgjigjen do ta marrë brenda 10 ditëve, pranë zyrave të ATP-së apo me postë. Në njofimin e ATP-së theksohet se ky shërbim është pa pagesë. Teksa kundrejt pagesës do të mund të merren kopje të dokumentacioint. “Subjekti paraqitet pranë Zyrës se Financës, ATP, për te paguar tarifën përkatëse në varësi të faqeve të dokumentacionit të kërkuar. Kjo tarifë është 20 lekëpër faqe deri në 100 faqe, dhe 2,500 lekë për mbi 100 faqe”, thuhet në njofimin e ATP-së.
ma.me
