Prokuroria e Durrësit është një hap pranë zbulimit të dramës së familjes Kajtazi dhe dy vajzave Orialdës dhe Klevisës të cilat u arratisën një muaj më parë nga shtëpia. Mësohet se dy motrat adoleshente kanë lajmëruar punonjësit e policisë së qytetit bregdetar pak para se t’i vinin flakën shtëpisë dhe të arratiseshin.
Efektivët kanë shkuar në banesën e tyre pasditen e 15 korrikut për të pyetur Orialdën 18-vjeçare dhe motrën e saj Klevisën 14 vjeç mbi shkakun e helmimit të prindërve të tyre dhe motrës së madhe. Prokuroria e Durrësit thotë se pas këtij momenti, vajzat e kanë ndjerë veten të frikësuara se mos plani i tyre i helmimit të prindërve zbulohej nga policia. Mbi të gjitha, vajzat kishin frikë nga dhuna që mund t’i priste më tej nga prindërit, por edhe motra, pasi sipas dëshmisë së tyre, ato keqtrajtoheshin vazhdimisht.
Dhe sipas organit të akuzës, për të shpëtuar dy motrat gjetën si të vetmen zgjidhje largimin nga shtëpia. Para se të digjnin shtëpinë, vajzat morën me vete disa veshje, dokumentet e identifikimit të tyre dhe të motrës së madhe dhe disa lekë të familjes.
Në rrëfimin e tyre përpara hetuesve, motrat Kajtazi kanë hedhur dritë edhe mbi letrën me shkrimin e Klevisës që lanë në shtëpi para se të braktisnin gjirin familjar. Motrat e shkruan letrën me qëllim që ngjarja të dukej sikur ishte kryer nga persona që donin të hakmerreshin, dhe të hiqnin kështu përgjegjësinë nga vetja.
Në letër shkruhej: Meti ta morr hakun, të lashë pa shtëpi dhe pa dy vajzat e tua që nuk do t’i shohësh më me sy kurrë…
Motrat Kajtazi u larguan nga shtëpia më 15 korrik dhe u gjetën nga policia më 13 gusht në një banesë me qira që kishin marrë në qytetin e Vlorës.
