Prokuroria e Krujës ka zbardhur skenarin e përgatitur nga 6 persona për të grabitur Fatmir Pulën mbrëmjen e 19 janarit, por që përfunduan duke e vrarë 44-vjeçarin, shkruan Panorama.
Nga ana e organit të akuzës u kërkua lënia në burg e 5 autorëve të arrestuar, bashkë me autorin e shpallur në kërkim. Ata akuzohen se, në bashkëpunim me njëri-tjetrin, i kanë zënë pritë për ta grabitur shtetasit Fatmir Pula.
Gjatë tentativës për ta grabitur, njëri prej personave të dyshuar e ka qëlluar me automatik, duke i shkaktuar vdekjen. Ngjarja ka ndodhur në fshatin Zezë të komunës Nikël, në Krujë, rreth orës 20:30 të datës 19 janar.
Fillimisht u hodhën dyshimet për vrasje për hakmarrje, pasi viktima ishte vëllai i një punonjësi policie, por shumë shpejt u vërtetua se bëhej fjalë për një grabitje.
“Pas kryerjes së veprimeve paraprake hetimore, të cilat filluan qysh në momentin e njoftimit për vrasjen dhe vazhduan deri në mëngjesin e datës 20.01.2016, është bërë e mundur të siguroheshin të dhëna lidhur me autorin e dyshuar të vrasjes, konkretisht shtetasin Admir Haka.
Ky shtetas rezulton të ishte banor i fshatit Zezë, Nikël, njëkohësisht fqinj me viktimën. Veprimet hetimore provuan se nuk kishim të bënim me veprën penale të “vrasjes me paramendim”, por qëllimi parësor i autorëve ishte shtënia në dorë e pasurisë së viktimës, veprime të cilat sollën si pasojë vrasjen e viktimës Fatmir Pula”, bën të ditur organi i akuzës.
Po kështu, rezultoi se personi i dyshuar Admir Haka për këtë qëllim kishte organizuar dhe ekzekutuar planin kriminal në bashkëpunim me shtetasit Herton Haka, Aleksandër Haka, Otion Metuku, Hekuran Boci dhe E.C., familjarë dhe të njohur mes tyre.
“Pas një plani paraprak që ka pasur për qëllim vjedhjen e pasurisë së viktimës Fatmir Pula, të hartuar qysh më parë ndërmjet shtetasve Admir Haka, Oltion Metuku dhe E.C., më datë 19.01.2016, rreth orës 20:00, shtetasit Admir Haka dhe E.C. kanë shkuar në afërsi të shtëpisë së viktimës Fatmir Pula. Pasi kanë marrë më parë armën që e kishin fshehur te vëllai i shtetasit Admir Haka, kanë vënë thasë në rrugën që të çonte në banesën e viktimës.
Pasi i kanë bërë thirrje për të ndaluar këtij të fundit, kanë kapërcyer gardhin duke qëlluar në drejtim të shtetasit Fatmir Pula, pasi ky i fundit doli jashtë mjetit të tij”, thuhet në materialin e akuzës. Nisur nga këto është kërkuar në Gjykatën e Krujës lënia në burg pa afat e të akuzuarve.
Panorama
