Dënimi i ish-prokurores, Vahide Badivuku, me tre vjet burgim për marrje ryshfeti nga gjykata e shkallës së parë, sipas prokurorisë, është dënim i vogël dhe i papeshuar mirë.
Kundër këtij vendimi, përveç prokurorisë në Gjykatë të Apelit ka deponuar ankesë edhe mbrojtja e Badivukut, duke i kërkuar gjykatës që ta lirojë nga të gjitha akuzat. Ato janë shqyrtuar të hënën, shkruan Koha Ditore.
Ish-prokurorja është akuzuar për marrje ryshfeti, si dhe për keqpërdorim të detyrës zyrtare në vitin e kaluar. Prokuroria beson se gjatë një procesi hetimor ajo kishte kërkuar 32 mijë euro ryshfet për lirimin e disa personave nga paraburgimi.
Gjatë seancës të hënën, meqenëse nuk është e obliguar prania e prokurorisë në seancë shqyrtuese, trupi gjykues ka njoftuar të pranishmit se prokuroria po i kërkon gjykatës që të përmirësojë aktgjykimin kundër ish-prokurores, duke e konsideruar si dënim të lehtë krahas veprave penale për të cilat akuzohet. (b.an)
