Prokuroria e Posaçme (SPAK) ka shpallur sot pretencën për të pandehurit e laboratorit të drogës në Has, që është një prej fraksioneve të dosjes 339.
Prokuroria kërkon për Gjevi Ndokën 8 vite burg, për Altin Avdyli 6.8, Esat Mehmeti 10 vite burg, Petrit Suljemani 8 vite, Sajmir Sulejmani 8 vite, Hajri Seferi 10 vite, Orges Jahoelezi 6.8 vite, Shkëlqim Avdyli 4 vite, Mario Zeqiri 4.8 vite, Elton Shehaj 4.8 vite, Ardit Gjyriqi 4 vite, Admir Hoxha 12 vite; Hekuran Hoxha njohur si Roni 10 vite, Vehbi Berushi 8 vite, Anila Shuti 8 vite, Xhavit Shuli dhe Famur Cela, këto 2 të fundit me nga 12 vite.
Në tetor 2018 në seancat e zhvilluara te Krimet e Rënda në Tiranë dhe Gjykata e Shkallës së Parë në Lezhë u lanë në burg 24 nga të arrestuarit, ndërsa 10 u ndryshua masa, nga të cilët 8 në arrest shtëpie dhe dy në detyrim paraqitje.
Koka e grupit që drejtonte laboratorin akuzohet se është Admir Hoxha, në kërkim.
Ata akuzohen për veprat peanel: “Trafikimi i narkotikëve”, “Prodhimi dhe fabrikimi i lëndëve narkotike dhe psikotrope”, në bashkëpunim, në formën e posaçme të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, “Pastrimi i produkteve të veprës penale”, në bashkëpunim, “Prodhimi dhe shitja e narkotikëve”, në bashkëpunim. Seanca e radhës, do të mbahet më 16 nëntor, për të pritur avokatin që të dalë nga karantina.
g.kosovari
