Çështja Ardian Fullani tashmë është një kapitull i mbyllur për drejtësinë shqiptare. Pas pafajësisë së dhënë nga Gjykata e Apelit, tashmë ish-guvernatori duket se u lirua përfundimisht nga çdo akuzë për çështjen e grabitjes së 713 milionë lekëve nga thesari i shtetit dhe abuzimet me tenderin e ish-hotel Dajtit.
Kjo pasi Prokuroria nuk ka bërë rekurs në Gjykatën e Lartë, dhe për më tepër afati ligjor për këtë hap ka përfunduar.
Tashmë, me përfundimin e afatit për rekurs, vendimi i pafajësisë për Fullanin merr formën e prerë dhe çështja mbyllet përfundimisht.
Burimet nga Gjykata e Lartë të pyetur për këtë çështje, konfirmojnë se rekursi për çështjen nuk është bërë.
Afati për këtë veprim ishte 23 janari.
Prokuroria kishte kërkuar dënimin me 5 vite burg për Fullanin, por dy shkallët e para e shpallën të pafajshëm.
Ai akuzohej se me mosveprimet e tij, krijoi kushtet që të grabitej banka. Akuza e dytë lidhej me abuzime në tenderin e ish-hotel Dajtit.
