Ish-ministri Spiro Ksera refuzon të japë shpjegime për Prokurorinë. Një oficer hetues i njësisë Task-Forcë Antikorrupsion ka shkuar në paraburgimin ku mbahet ish-ministri dhe i ka dhënë mundësinë Spiro Kserës për të dhënë shpjegimet e tij në lidhje me akuzën.
Pasi ka dëgjuar hetuesin e Task-Forcës, ish-ministri ka thënë se nuk dëshiron të japë asnjë shpjegim në këtë fazë të çështjes.
“Nuk do të jap asnjë shpjegim për ju pa u njohur me dosjen ndaj meje”, mësohet të ketë thënë Spiro Ksera raporton Panorama.
Ai ka kërkuar që të njihet me krejt dosjen që Prokuroria ka ndaj tij, me provat, me dëshmitë dhe me çdo fakt tjetër që ka shërbyer për ngritjen e akuzës. Vetëm pasi të ndodhë kjo, ish-ministri ka thënë se do të japë shpjegimet e tij në lidhje me shpërdorimin e detyrës dhe vjedhjen për të cilën akuzohet.
I dyshuari e ngriti këtë pretendim edhe në gjykatë, ku tha se nuk ishte pyetur asnjëherë për akuzën. Ish-ministri Spiro Ksera u arrestua më 29 janar, me urdhër të Prokurorisë së Tiranës. Kjo e fundit filloi hetimet për disa fonde të shpenzuara nga ana e Ministrisë së Punës në periudhën korrik 2013.
Me firmën e ish-ministrit Ksera, sipas Prokurorisë, janë shpenzuar 300 milionë lekë për mbajtjen e gjashtë aktiviteteve.
Sipas listës së Prokurorisë, aktivitetet kanë qenë: “Prioriteti i minoriteteve-Barazi në të drejta”; “Kapërceni paragjykimet – Njihni romët”; “Ne sfidojmë të gjithë së bashku”; “Të ndryshëm, por të barabartë”; “Përfshirje sociale – Drejtësi sociale” dhe “Mosha e tretë, vlerë për shoqërinë”. Bazuar në kallëzimin e KLSH-së, Prokuroria ka sekuestruar dosjet e këtyre gjashtë aktiviteteve në Ministrinë e Punës.
Nga verifikimi i bërë ka rezultuar se në dosjet e mbajtura për paratë e shpenzuara në secilin aktivitet, kishte dokumente fiktive. Më konkretisht, në fotot dhe videot e ruajtura në CD për aktivitetet në fjalë, ishin futur imazhe dhe pamje të tjera që nuk kishin asnjë lidhje. Kështu, në dy dosje janë gjetur foto të njëjta, por që ishin manipuluar me fotoshop.
Fotot e futura në dy dosje për të justifikuar shpenzimin e parave i përkisnin një aktiviteti të vetëm, që ishte organizuar nga OJF të huaja dhe jo me fondet e Ministrisë. Në të njëjtën mënyrë, sipas Prokurorisë, janë manipuluar gjashtë dosjet e aktiviteteve duke futur foto dhe video që nuk kanë lidhje pasi aktivitetet në fjalë nuk kanë ndodhur.
