Industria, mjaft e përhapur në vend, e prodhimit me porosi në fushën e këpucëve dhe rrobave përfiton një lehtësi të madhe fiskale. Qeveria ka vendosur që në Paketën Fiskale të vitit 2017-s të reduktojë tarifat doganore nga 2%, 6%, 10% dhe 15% në masën 0% për lëndën e parë të përdorur në industrinë fasone.
Sipas relacionit shoqërues të projektligjit përkatës, të paraqitur në Kuvend, kjo masë parashikohet pasi prodhimet e destinuara për tregun europian kanë shfaqur vështirësi serioze lidhur me kostot e prodhimit dhe kryesisht me lëndët e para. Që këto mallra të përfitojnë origjinë preferenciale, lëndët e para duhet të jenë me origjinë EU, EFTA, CEFTA, të cilat kanë kosto më të lartë dhe, rrjedhimisht, çmime përfundimtare më pak konkurruese për mallrat e prodhuara nga kjo industri.
Në rastet e importit të lëndëve të para nga vendet jo EU, EFTA, CEFTA në Kodin Doganor, me qëllim përfitimin e origjinës preferenciale, kërkohet pagesa e tarifës doganore, megjithëse mallrat pas përpunimit janë të destinuara për eksport.
Reduktimi i këtyre tarifave do të krijonte një klimë më të favorshme për këtë industri, duke rritur eksportin dhe konkurrueshmërinë në tregjet ndërkombëtare.
Gjithashtu në këtë Paketë Fiskale përfshihet reduktimi i tarifës në masën 0%, nga 2%, që është aktualisht, të produktit koks dhe gjysmëkoks nga qymyrguri. Argumentimi i projektligjit shpjegon se qymyri për koksifikim është një nga lëndët djegëse, që përdoret për procese teknologjike në furra pasurimi mineralesh etj. Ulja e tarifës për këtë produkt do të favorizonte industrinë prodhuese e përpunuese në vend, duke ulur ndjeshëm kostot dhe duke nxitur prodhimin në vend dhe gjithashtu eksportin në tregun ndërkombëtar.
Duhet theksuar që kjo tarifë është 0% nëse importohet nga vendet EU, CEFTA, EFTA.
Projekti TAP avancon me ritme të përshpejtuara
Gazsjellësi TAP po zbaton me ritme progresive punimet për shtrimin e tubacioneve. Sipas të dhënave nga projekti, gjatë kësaj periudhe janë bërë gati 178 kilometra rrugë, janë lidhur 102 kilomtra tuba, ndërsa janë ngjitur rreth 70 kilometra. Së fundmi, në një nga zonat më të vështira në territorin shqiptar, atë të Korçës, janë rehabilituar rrugët dhe urat e aksesit.
Në Shqipëri gjatë kësaj periudhe TAP ka ndërtuar 15.5 km rrugë dhe 9 ura, duke bërë të mundur ndërlidhjen e zonave malore me qendrat urbane. TAP është pjesë e Korridorit Jugor të Gazit, një projekt prioritar për Bashkimin Europian. Në nëntor TAP filloi në Fier punimet për të realizuar kalimin e tubacionit 1.1 km poshtë lumit Seman, një hekurudhe dhe një rruge.
ma.me
