Zbatimi i Programit IPARD me vlerë 71 milionë euro grant për bujqësinë dhe zhvillimin rural, parashikon të fillojë në vitin 2017, me mbështetjen e 2055 projekteve të reja investimi si dhe krijimin e rreth 800 vendeve pune në sektorin rural.
Struktura menaxhuese të këtij programi në Ministrinë e Bujqësisë, Zhvillimit Rural dhe Administrimit të Ujrave, kanë finalizuar paketën e mbështetjes për sektoret, “Njësi Ekonomike Bujqësore”, me shumën e akorduar nga BE prej 31,000,000 euro, për “Përpunimin dhe Tregtimin e Produkteve Bujqësore dhe të Peshkimit” me shumën prej 26,500,000 euro dhe “Diversifikimi i Fermave dhe Zhvillimi i Biznesit” me shumën prej 11,000,000 euro.
Përfituesit potencialë të këtij programi janë fermerët, sipërmarrjet ekonomike bujqësore, mikrobiznese dhe sipërmarrjet e vogla private jo-bujqësore të regjistruara në regjistrin kombëtar të fermave dhe QKR.
Programi do të fillojë zbatimin me marrjen e besimit nga KE të zbatimit të buxhetit të alokuar për Shqipërinë në vitin 2017, ku Agjencia e Pagesave (AZHBR), së bashku me Autoritetin Menaxhues në Ministrinë e Financave, do të hapin thirrjet për dorëzimin e aplikimeve ku do të përcaktohen kriteret e përzgjedhjes, afati i dorëzimit të dokumentacionit dhe buxheti në dispozicion./a.m.
