Partia Demokratike ka bërë publike disa nga ofertata e saj për qeverisje, në përfundim të fazës së parë të hartimit të programit të vet. PD parashikon se nën qeverisjen e tyre do të ketë rikthim të taksimit të sheshtë në nivelin më të ulët në ballkan, me 9 % dhe një TVSH të ulur në 15%. Në programin e saj PD parashikon luftë ndaj korrupsionit dhe zbatimin rigoroz të ligjit.
“Taksat e ulëta, zbritje e TVSH në nivelin 15 përqind, futja e taksës së sheshtë më të ulëtën në Ballkan në nivelin 9 përqind, janë disa nga pikat e platformës, që do ta bëjnë Shqipërinë vendin më atraktiv të rajonit për investime. Prioritet do të jetë po ashtu zbatimi i ligjit dhe lufta ndaj korrupsionit”, deklaron PD.
Deri në fund të muajit janar, do të bëhet edhe konsultimi final me specialistë të fushës, për ti pasuruar më tej këto dokumenta me ekspertizën dhe idetë më të mira. Në muajin shkurt, programi i secilit prej 22 departmenteve do t’i nënshtrohet diskutimit të hapur me grupet e interesit, në funksion të përmirësimit dhe përfshirjes së çdo opinioni të vlefshëm.
“Pas kësaj, në muajin mars, programet e departamenteve sipas fushave që mbulojnë, që janë dhe alternativa e Partisë Demokratike për zgjedhjet e ardhshme, do të bëhen publike.
“Projektet e detajuara, që sjellin punësim e zhvillim, do të prezantohen si në rastin e prezantimit të platformës së taksave të Partisë Demokratike, një muaj më parë”, përfundon deklarata e PD-së.
