Prodhuesit e bukës lajmëruan rritjen e çmimit sepse, sipas tyre, energjia elektrike për ta ishte e shtrenjtë.
Operatori i Shpërndarjes së Energjisë Elektrike ka deklaruar se nuk ka asnjë ndryshim tarifash të energjisë elektrike për furrat e bukës. Referuar disa raportimeve në media dhe pretendimeve të shoqatave të prodhuesve të bukës, OSHEE sqaron se nuk është rritur çmimi i energjisë.
Sipas OSHEE, tarifat janë përcaktuar nga Enti Rregullator i Energjisë që në fund të vitit 2017 dhe janë në fuqi.
“Tarifat janë përcaktuar nga Enti Rregullator i Energjisë që në fund të vitit 2017 dhe janë në fuqi. Pretendimi i disa prodhuesve të bukës qëndron në faktin se kërkojnë të tarifohen si furra buke edhe ato pika që jo vetëm prodhojnë bukën, por edhe tregtojnë produkte të tjera që nuk kanë lidhje me funksionin primar.
Enti Rregullator i Energjisë ka përcaktuar saktësisht trajtimin me tarifë të diferencuar dhe të ulur vetëm ato furra buke që funksion të tyre kanë prodhimin dhe shitjen e bukës. Furrat që tregtojnë produkte të tjera përveç bukës nuk janë përfshirë, nuk mund të përfshihen në këtë kategori”, thuhet në reagimin e OSHEE.
a.ç
