Drejtoritë e Bujqësisë kanë nisur të orientojnë fermerët për prodhimet që duhet të kultivojnë, nisur kjo nga kërkesat e tregut vendas dhe të huaj.
Kjo praktike e re, ka marrë shkas nga përvoja e viteve të fundit ku shumë produkte mbeteshin stok dhe shiteshin nën kosto.
Dhimitraq Qorri, specialist i drejtorisë së bujqësisë në Lushnje, shprehet se “Është një marrëveshje që duhet bërë. Produkti që mbillet në fushë të jetë i garantuar për t’u tregtuar dhe për t’u shitur. Aktualisht, ka përfunduar mbjellja e perimeve në sera, sipas vargëzimit që kanë ato. Është pothuajse në përfundim mbjellja e shalqinit në zonën e Divjakës”.
Por, kjo nismë është koordinuar edhe me pikat e grumbullimit të këtyre produkteve që do kërkojnë të mbillet ajo çka kërkohet më tepër duke siguruar edhe farat e kulturave përkatëse. Edhe fermerët shprehen të kënaqur me këtë sistem.
Në rrethin e Lushnjës janë rreth 525 ha sera të mbjella , 60% kultivojnë domate 20 % trangull dhe 10 % spec, pasi këto janë edhe produktet më të kërkuara, për të cilat këtë vit janë lidhur rreth 30 kontrata me fermerët./a.m.
