Hyrja nga rrethrrotullimi “Shqiponja” deri tek “Zogu i Zi” do të jetë e bllokuar për 4 muajt në vazhdim për shkak të punimeve që do të zhvillohen për “Unazën e Madhe”.
Ky bllokim ka nisur një ditë më parë dhe menjëherë është reflektuar me një shtim në trafikut në shumë nga rrugët e kryeqytetit. Tashmë qytetarët që duan të dalin nga Tirana duhet të përdorin rrugën nga “Spitali Ushtarak”, ndërsa ata që do të hyjnë duhet të kalojnë nga zona e Astirit.
Projekti i Unazës së Madhe kap një vlerë investimi prej 4.9 miliardë lekësh dhe deri tani është realizuar pjesa më e madhe e tij.
I ftuar në “Wake Up”, zv.drejtori i Autoritetit Rrugor Shqiptar, Erion Koka tregoi më shumë për këtë projekt të rëndësishëm, por edhe për alternativat që duhet të zgjedhin qytetarët për të vijuar me hyrjet dhe daljet nga kryeqyteti.
“Problemi më i madh është për hyrjen në Tiranë, problemi më kompleks që ka aty. Për daljen nga Tirana është më e thjeshtë, sepse ne vazhdojmë më rrugën ‘Dritan Hoxha’ ose rrugën e ‘Durrësit’ deri te sheshi Shqiponja.
Pa shkuar te sheshi, 100 metra më para devijon djathtas dhe kthehesh të rruga ‘29 nëntori’ që është rruga që të çon drejt Casa Italia dhe më pas hyn në superstradë. Dalja është shumë e thjeshtë.
Problemi është kur hyjmë në Tiranë. Kush do kalojë nëpërmjet Unazës së Re duhet të devijojë menjëherë djathtas.
Por ata që duan të shkojnë drejt Zogut të Zi kanë një bllokim dhe jemi të ndërgjegjshëm. Është një semafor afër urës së Lanës, i cili ka edhe një polic rrugor që është i stacionuar aty gjithmonë për t’i dhënë akses ambulancave dhe emergjencave”, sqaroi ai.
Për sa i përket projektit të tij, ai theksoi se kjo është një vepër e jashtëzakonshme dhe nuk do jetë më ajo gangrena që ishte deri sot.
“Në një 5 vjeçar ju nuk do ta njihni më këtë zonë. Do jetë totalisht një pjesë e re e qytetit, e ndërtuar nga e para”, tha Koka.
g.kosovari
