Ditën e sotme kryeministri Edi Rama dhe ministri i Brendshëm, Ervin Hoxha, kanë prezantuar një anketim mbi punën e Policisë së Shtetit në vend.
Sipas anketës së prezantuar, 65% e qytetarëve vlerësojnë punën e Policisë si “Të mirë” ose “Shumë të mirë”, ndërsa 82% e qytetarëve shprehen se ndihen të sigurt në zonat e tyre të banimit.
Ndërkohë eksperti i sigurisë, Fatjon Softa, ka evidentuar disa problematika të Policisë së Shtetit, përmes një lidhjeje live me ‘Ditari i Pasdites’ me gazetaren Bruna Çifligu në A2 CNN.
Softa tha se duhet studiuar gjendja e strukturës së brendshme të Policisë, për të evidentuar problemet e strehimit, problemet me sëmundjet profesionale, problemet me papunësinë e familjarëve të tyre, probleme që sipas tij, kanë lindur me kualifikimin dhe me ngjitjen në karrierë të punonjësve të policisë.
Ai shtoi se për sa kohë që ka njerëz të fortë që qarkullojnë dhe për aq kohë sa ka njerëz të pasur që kanë krijuar këtë lloj hendeku dhe që merren me pastrimin e parave, sipas ekspertit, tregojnë realitetin e gjendjes së brendshme të Policisë por edhe të vetë shtetit.
“Duhet t’i kthehemi vetë strukturës së brendshme të Policisë, duke parë gjendjen e tyre të brendshme. Domethënë, problemet e strehimit, problemet me sëmundjet profesionale, problemet me papunësinë e familjarëve të tyre, probleme që kanë lindur me kualifikimin dhe me nxitjen në karrierë të punonjësve të policisë.
Jo vetëm thjeshtë duke i nxitur dhe simuluar ata politikisht. Ka ndryshime dhe këto ndryshime erdhën si rrjedhojë e një gare, ku filloi nga drejtori i përgjithshëm te drejtori i qarqeve, që ishte një risi dhe një akt pozitiv që është bërë në drejtim të hapjes së garës dhe mundësisë që nga gjiri i policisë të kesh mundësi të bësh karrierë.
Ajo që çedon është mundësia e komunikimit me publikun dhe informacioni që publiku do të japë për ta. Për sa kohë ka njerëz të fortë që qarkullojnë dhe për aq kohë sa ka njerëz të pasur, që kanë krijuar këtë lloj hendeku që merren me pastrimin e parave, tregojnë realitetin e gjendjes së brendshme”, tha Softa.
