Banka e Shqipërisë deklaroi se rritja e çmimeve do të mbetet e dobët edhe për vitin e ardhshëm. Pas mbledhjes së fundit të Këshillit Mbikëqyrës, guvenratori Gent Sejko listoi arsyet që e çojnë bankën në këtë parashikim.
Këshilli Mbikëqyrës vendosi ta mbajë të pandryshuar normën bazë të interesit në 1.75 për qind, duke parlajmëruar se politika monetare do të mbetet lehtësuese edhe vitin që vjen, për të mbështetur rigjallërimin e kredisë.
Guvernatori Sejko tha gjithashtu se, rigjallërimi i kredisë dhe rritjes ekonomike nuk varet vetëm nga politikat e Bankës së Shqipërisë, por kërkojnë edhe kontributin e qeverisë. Banka e Shqipërisë vlerëson se, rritja ekonomike për këtë vit do të luhatet nga 2.5 deri në 2.7 për qind, ndërsa vitin e ardhshëm ajo pritet të përshpejtohet në mbi 3 për qind.
* Vendimi më i rëndësishëm është ai i normës bazë të interesit, të cilin Këshilli Mbikëqyrës ka vendosur ta mbajë të pandryshuar, në nivelin e 1,75%, pasi në këtë mënyrë inflacioni pritet të rritet gradualisht drejt objektivit afatmesëm. Sa i përket nivelit të tij në muajt tetor dhe nëntor, ishte pikërisht 2,1%, duke dëshmuar kështu frenimin e ecurisë së shpejtë të rritjes së tij gjatë dy muajve paraardhës.
Ashtu siç kishte vlerësuar edhe Banka e Shqipërisë, kjo rritje ishte shkaktuar nga faktorë të përkohshëm, ndërkohë që presionet e përgjithshme inflacioniste mbetën të ulëta. Niveli i inflacionit është përcaktuar kryesisht nga inflacioni i lartë i çmimeve të mallrave ushqimore, veçanërisht nga ushqimet e freskëta e të papërpunuara. Sa i përket çmimeve të elementëve të tjerë të shportës kanë dhënë një kontribut rënës në normën e inflacionit.
Nga këndvështrimi makroekonomik, niveli i inflacionit do të vazhdojë të pasqyrojë nivelin nën potencial të ekonomisë shqiptare, bëri të ditur guvernatori Sejko, pasi rritja e kërkesës agregate gjeneron kapacitete të pashfrytëzuara në tregjet e punës dhe të kapitalit.
Banka e Shqipërisë gjykon se hendeku negativ i prodhimit dhe çmimet e ulëta në tregjet botërore do të vazhdojnë të jenë të pranishme në periudhë afatshkurtër. Efekti i tyre rënës në inflacion do të kompensojë efektin rritës së çmimeve të ushqimeve, për rrjedhojë inflacioni mesatar për 2016-n pritet të jetë rreth 2,3%. Më tej, do të kthehet në objektivin e BSH-së prej 3% rreth fillimit të vitit 2018. Ky kthim i tij në objektiv do të mbështetjet nga gjallërimi i pritur i ekonomisë në vitet në vijim. / Top Channel