SPAK ka thirrur për të marrë në pyetje lidhur me aferën e privatizimit të Kompleksit Partizani, ish-ministrin e Ekonomisë, Genc Ruli.
Më herët, SPAK ka pyetur ish-ministrat e Mbrojtjes Fatmir Mediu dhe Gazment Oketa si dhe ish-funksionarë të tjerë.
Ruli, i cili është një nga themeluesit e PD, ka mbajtur postin e ministrit të Ekonomisë në vitet 2005-2009.
Ndërkohë, po sot do të pyeten ish-ministri i Mbrojtjes Arben Imami si dhe ish-kreu i Forcave të Armatosura, Xhemal Gjunkshi.
Ende nuk ka një datë konkrete se kur SPAK do të thërrasë ish-kryeministrin, Sali Berisha.
Ai ka deklaruar se nuk ka marrë asnjë ftesë të tillë ende.
SPAK ka regjistruar procedimin penal për privatizimin e ish-Kompleksit Partizani.
Hetimet po kryhen mbi bazën e një kallëzimi të kreut të grupit të PS-së, Taulant Balla, i cili ka kallëzuar Berishën për shkelje të ligjit të privatizimit.
Në kallëzim përfshihen gjithashtu ish-ministri i Mbrojtjes, Arben Imami, anëtarë të tjerë të kabinetit qeveritar gjatë viteve 2005-2013.
Gjithashtu në hetim për këtë çështje janë dhe dhëndri i Berishës, Jamarbër Malltezi si dhe disa ndërtues të njohur në Tiranë.
/f.s
