Kryeministri Edi Rama priti të ftuarit në Kongresin e Partisë Socialiste, me një fjalë të shkurtër falënderimi.
“Vetëm dy fjalë, posaçërisht për ata që na nderuan duke ardhur nga larg, nga Kosova, Maqedonia, Mali i Zi, përfaqësues të partive politike shqiptare. Është kënaqësi t’i kemi midis nesh në prag të Kongresit.
Falënderoj edhe ata që pata kënaqësinë të takoj e që janë në themele të kësaj partie, që i kanë dhënë jetë dhe kanë pasur një rol kyç për ta rritur, zhvilluar e forcuar Partinë Socialiste në periudha jo të lehta.
Falënderoj edhe të gjithë miqtë e tjerë, pa dyshim Shkëlqesitë ambasadorë e ambasadore që na kanë nderuar me praninë e tyre. Zyra e marrëdhënieve me jashtë ishte e shqetësuar që s’kishte konfirmim, por ja tek kanë ardhur të gjithë.
Falënderim të veçanta kryeministrit legjendar të Italisë në kohën e përpjekjes së madhe për çlirimin e Kosovës, mikut tonë të shtrenjtë Massimo D’Alema, që na ka nderuar me praninë e tij”, tha kryetari i Partisë Socialiste, Edi Rama.
