Një krim i rëndë në familje ka ndodhur mesditën e sotme në Prishtinë, ku tre persona janë vrarë me armë zjarri.
Ngjarja ka ndodhur rreth orës 13:20 në lagjen “Dardania”, në rrugën “Bill Klinton” në Prishtinë.
Rrethanat e ngjarjes janë ende të paqarta, por flitet për krim në familje ku një person vrau fillimisht nusen e djalit të tij, pastaj gruan e tij dhe veten.
Bëhet e ditur se në momentin kur ndodhi ngjarja tragjike në vendin ku ndodhi rasti kishte qenë prezent edhe një fëmijë.
Rastin e ka konfirmuar kryeprokurori i Prokurorisë Themelore në Prishtinë Imer Beka. “Po kemi marrë informacion që tre persona kanë ndërruar jetë. Sipas informacioneve të para dyshohet se një person ka vrarë gruan, nusen e djalit të tij dhe më pas ka vrarë edhe veten”, ka bërë të ditur Beka.
Nuk dihen ende shkaqet që e kanë detyruar këtë person të ndërmarrë këtë akt të rëndë ndaj vetes dhe familjarëve të tij.
Menjëherë pas marrjes së këtij informacioni në vendin e ngjarjes kanë shkuar edhe forca të shumta policie, të cilat janë duke punuar në sqarimin e të gjitha rrethanave që kanë të bëjnë me rastin.
/a.rada
