Qeveria përmes një projektligji të veçantë synon të rregullojë tregun e menaxhimit të mbetjeve në nivel lokal, si dhe të unifikojë kostot që duhet të paguajnë qytetarët në taksat e tyre vendore për pastrimin. Kjo do të thotë se do të këtë një metodologji dhe sistem të unifikuar për të gjitha bashkitë pasi ajo që ndodh sot është se secili nga pushtet vendore kanë mënyrë të ndryshme tarifimi dhe kostoje për mbetjet urbane. Për të përcaktuar kompetencat e reja sipas draftit, ministri i Mjedisit Blendi Klosi takoi kryebashkiaket.
Klosi: Është e papranueshme që në vitin 2018 të kemi një sistem të çorganizuar të trajtimit të kostove dhe tarifave të trajtimit të mbetjeve urbane duke sjellë kosto të ndryshme nga një bashki në tjetrën, ndaj përgatitja e një formule nga ekspertët e fushës do të bëjë të mundur që të kemi transparencë në llogaritjen e kostove të menaxhimit të mbetjeve urbane, të kemi projekte të qarta e të mbrojtura si dhe kontrata të përcaktuara në bazë të normave dhe standardeve.
Sistemi i unifikuar i kostimit dhe tarifimit të mbetjeve urbane synon rritjen e shkallës së mbrojtjes së mjedisit, zbatimin e standardeve më të mira në menaxhimin e mbetjeve urbane dhe planifikimin më të mirë të menaxhimit në tërësi.
Gjatë diskutimit me kryetarët e bashkive, ministri Klosi theksoi se duhet punuar për një menaxhim më të mirë të vendgrumbullimeve të vogla, me qëllim ndarjen në burim të mbetjeve.
a.ç
