Shqipëria po kthehet gjithmonë e më shumë në qendër të vëmendjes nga mediat e huaja, të cilat e sugjerojnë si një ndër destinacionet më të mira për pushime. Kësaj here është prestigjiozja britanike “Mirror” që shkruan për kryeqytetin shqiptar, Tiranën, duke e cilësuar si një destinacion surprizë me çmime të përballueshme dhe bukuri të mahnitshme.
Në një artikull të gazetës, gazetarja Ellen Jenne sjell përvojën e ekspertes së udhëtimeve Chelsea Dickenson, e cila zbuloi Tiranën si një qytet që duhet vizituar të paktën një herë. “Tirana është vërtet interesante. Shqipëria ka marrë shumë vëmendje për Rivierën e saj, por kryeqyteti është absolutisht i mrekullueshëm,” shprehet Dickenson.
E vendosur në zemër të Shqipërisë dhe e rrethuar nga kodra e male, përfshirë malin e Dajtit, Tirana ofron një kombinim unik të historisë, natyrës dhe kulturës urbane “Tirana është parajsë për ata që kërkojnë hapësira të gjelbra dhe relaks në natyrë, veçanërisht gjatë muajve të verës,” thuhet në artikull. Kultura e kafeneve dhe restoranteve në ambiente të hapura është një tjetër atraksion, ku mund të shijosh gjithashtu edhe ëmbëlsira tradicionale.
Përveç shijes, Tirana ofron edhe përjetime kulturore. Në një kohë kur udhëtarët kërkojnë gjithnjë e më shumë përvoja me çmime të arsyeshme, Shqipëria dhe veçanërisht Tirana, po shndërrohen në një destinacion ideal dhe gjithnjë e më të kërkuar në hartën e turizmit evropian.
