Bujar Nishani le te kuptoj se eshte ende brenda afateve kushtuese per dekretimin e ministrave pas kercenimeve per shkarkim.
Ai vazhdon të mos dekretojë dy ministrat Arben Ahmetaj dhe Milva Ekonomi, duke thënë se po respekton Kushtetutën.
Jo vetëm kaq, por Nishani ka replikuar edhe me Ramën, duke thënë se ai nuk e njeh Kushtetutën dhe e ka shkelur atë disa herë.
“Një kryeministër, i cili ka shkelur në mënyrë të përsëritur Kushtetutën e vendit, kjo e konfirmuar përmes vendimeve të Gjykatës Kushtetuese në Shqipëri.
Nuk besoj se e njeh mirë Kushtetutën e vendit.
Natyrisht që detyra e presidentit është që të konsultohet me Kushtetutën, është që të kërkojë interpretimin e Kushtetutës dhe unë këtë do të bëj dhe po bëj, sepse unë i përkas atij grupi njerëzish, të cilët e konsiderojnë punë e shtetit, punë serioze.
Gjithçka do të bëhet në bazë të ligjeve, në bazë të Kushtetutës se vendi dhe në bazë të seriozitetit, që meritojnë qytetarët shqiptarë dhe shteti shqiptar”, thotë Nishani për TV Klan.
Kryeministri Rama u shpreh një ditë më parë se nuk ishte e nevojshme që ai të bisedonte me presidentin për dekretimin e ministrave, duke thënë se presidenti bisedon me Kushtetutën, Kushtetuta me presidentin dhe pasi merren vesh bëhet dekretimi.
Parlamenti nuk i hodhi në votim dy dekretet e kreut të shtetit për shkarkimin nga detyra te Canit dhe Ahmetajt.
Ata pritet të votohen njëkohesisht me dekretet për emërimet e Ahmetajt tek Financa dhe Ekonomit, tek Ekonomia.
Por, në rast se Nishani i shkon deri në fund kësaj loje, nuk është çudi që ai të shkarkohet si president, siç paralajmëroi ministrja Felaj.
