Presidenti, Bujar Nishani, këmbëngul në kundërshtit e tij ndaj ligjit për kthimin dhe kompensimin e pronave të miratuar nga Parlamenti. Këtë qëndrim ai ia ka bërë të ditur sot edhe Presidentit të ri të Gjykatës Evropiane të të Drejtave të Njeriut, Guido Raimondi, gjatë një takimi në Presidencë. Kreu i shtetit, i cili e ka ankimuar ligjin në fjalë edhe në Gjykatën Kushtetuese, është shprehur se ky ligj cënon të drejtat e ish pronarëve. “Përmes këtij ligji, është prekur standardi i vendosur përmes Kushtetutës dhe jurisprudencës së saj, por edhe standardi i vendosur nga Konventa dhe jurisprudenca e saj, si dhe janë anashkaluar edhe mesazhet e dhëna nga GjEDNj jo vetëm përmes vendimit pilot, por edhe çështjeve më të fundit të trajtuara prej saj”, ka deklaruar Nishani. Ky qëndrim kundërshtues i Presidentit ndaj ligjit për kthimin dhe kompensimin e pronave, ka qenë prej shumë kohësh në qendër të debateve mes tij si institucion dhe mazhorancës qeverisëse.
Po në këtë takim kreu i shtetit i është rikthyer edhe një herë çështjes së reformës në drejtësi duke nënvizuar se kjo reformë është prioritare, pasi është e vetmja mundësi për të krijuar një sistem drejtësie, të pavarur, profesional, dhe të pakorruptuar. Presidenti Nishani shprehu besimin se pas opinionit të Komisionit të Venecias, forcat politike nuk duhet të humbin më kohë por duhet të veprojnë dhe punojnë për ndryshimet kushtetuese që do të sigurojnë ndërtimin e një sistemi drejtësie sipas parimit të kontrollit dhe balancës.
(javanews.al) Ar. Me
