Presidenti i Kolumbisë, Gustavo Petro, ka bërë thirrje që Kombet e Bashkuara të krijojnë një forcë të armatosur paqeje për territoret palestineze. Sipas tij forcat e armatosura, duhet që të përfshijnë edhe shpërndarjen e ndihmave humanitare.
Në një fjalim zyrtar të mbajtur të martën, 2 gusht, Petro njoftoi se do ta paraqesë këtë propozim në Këshillin e Sigurimit të OKB-së.
“Sot ekziston vetëm një rrugë, nëse duam të respektojmë të drejtën ndaj njerëzimit: të kërkojmë përfundimin e gjenocidit nga Izraeli”, tha ai, duke bërë thirrje që Asambleja e Përgjithshme e Kombeve të Bashkuara të votojë për krijimin e një force të armatosur paqeje që të ndërhyjë në Palestinë. Petro theksoi se edhe Kolumbia duhet të marrë pjesë në një nismë të tillë.
“Nëse kjo nuk ndodh, nuk do të na respektojnë dhe do të vazhdojnë të vrasin fëmijë në Gaza deri në zhdukje”, deklaroi ai.
Sipas presidentit kolumbian, bota nuk mund të qëndrojë indiferente përballë asaj që ai e cilëson si gjenocid: Bomba që bien mbi Gazë do të bien edhe në Bogota, Caracas e Buenos Aires, pa marrë parasysh se çfarë mendojnë presidentët e tyre.
Në fund të fjalimit, Petro kritikoi edhe ish-presidentin Ivan Duque për takimin e tij të fundit me kryeministrin izraelit, Benjamin Netanyahu.
