Presidenti i Republikës së Austrisë Heinz Fischer, i cili ndodhet në vizitë zyrtare shtetërore në Kosovë me ftesë të presidentes Atifete Jahjaga, ju drejtua deputetëve të Kuvendit të Republikës së Kosovës.
Ai, sipas lajmërimit, mbajti një fjalim deputetëve të Kuvendit në orën 9 e 20 minuta.
Pas fjalimit në Kuvend, dy presidentët, Fischer e Jahjaga, në orën 10:45 do të nisen për vizitë në Prizren. Në këtë qytet janë paraparë vizita në Kishën Katolike dhe në Xhaminë e Sinan Pashës.
Por Presidenti austriak, Heinz Fischer, është bërë sebep që Kuvendi i Kosovës për herë të parë në sesionin vjeshtor ta zhvillojë një seancë normale, madje me solemnitet, shkruan Koha Ditore.
Pas takimit që ka pasur me të, të mërkurën, presidentja e Kosovës, Atifete Jahjaga, ka konfirmuar se do t’i drejtohet Gjykatës Kushtetuese për të shqyrtuar përputhshmërinë e parimeve të Asociacionit me Kushtetutën.
Ndërkohë në Prishtinë po mbahet forumi ekonomik kosovaro-austriak B2B në të cilën po marrin pjesë 27 kompani austriake dhe rreth 100 kompani nga Kosova.
