Rudi Vata ka deklaruar se i janë kërkuar 2 milionë euro për të blerë votat në kohën kur ai hodhi kandidaturën për t’u zgjedhur president i FSHF-së, duke sfiduar Dukën.
Deklarata e ish-kapitenit të kombëtares është bërë direkt në televizion mbrëmë, gjatë emisionit “Rubrika Sportive” në TVSH.
Në zgjedhjet e Asamblesë së Përgjithshme, zhvilluar më 9 mars 2010, Vata ishte një nga tre kandidatët për postin e presidentit të Federatës, bashkë me Armand Dukën, president në detyrë, dhe Refik Halilin.
“Unë erdha të kandidoj për postin e presidentit me duar në xhepa dhe me një projekt në mendje dhe në zemër, por gjëja e parë që më thanë njerëzit e futbollit këtu ishte: “Duhet të hedhësh 2 milion euro për të blerë votat, ndryshe nuk zgjidhesh dot në krye të FSHF-së”. Në atë moment kuptova që njerëzit këtu kishin komplet tjetër koncept për futbollin nga ideja që unë kisha në kokë”, tha Vata. Në përfundim të procesit, zgjedhjet u rifituan nga Duka, ndërsa dy kandidatët e tjerë morën një numër të papërfillshëm votash.
Vata ka qenë ndër kundërshtarët e zjarrtë edhe të presidentit të Skënderbeut, Ardian Takaj, me të cilin ka debatuar ashpër edhe në studio televizive, lidhur me çështjen e trukimeve. Ai e ka quajtur të drejtë dënimin e Skënderbeut, për të cilin ndërkohë mund të hapen hetime të tjera.
Duke diskutuar mundësinë e një dënimi tjetër, Vata thotë se në të vërtetë nuk janë vetëm korçarët që bëjnë gjëra të tilla dhe sjell si shembull ish-skuadrën e tij, kur tha se ndeshja e fundit e tij në drejtimin e shkodranëve, Pogradeci-Vllaznia 2-1, ishte e trukuar.
d.i.
