Premtimi i parë i pambajtur i Dr.Kosovës
Nga Flogert Muça
Fushata për vendoret e 21 qershorit nisi që të nesërmen e publikimit të emrave nga subjektet politike. Veliaj-Kosova është padyshim vëmendja më e madhe publike, pasi vetë demografia e qytetit pas reformës territoriale e zgjeron Tiranën në territor dhe popullsi.
Menjëherë pas shpalljes së emrit të Veiajt nga ana e kryetarit të Partisë Socialiste Edi Rama, kandidati i majtë i dërgoi një mesazh kundërshtarit të djathtë ku e uronte dhe i premtonte një fushatë pozitive. Përgjigja e pavonuar e Dr. Kosovës ishte reciproke sa i përket llojit të fushatës, pra gjithçka pozitive, gjithçka “fair play”.
Për asnjë moment nuk duhet të dyshojmë se si Veliaj edhe Kosova janë figura politike të partive respektive. Natyrat që tregojnë janë të ndryshme, por filozofia që ndjekin është padyshim ajo e partive që përfaqësojnë. Qëndrimin deri më sot si kandidat i “pavarur” nga ana e Kosovës, të gjithë e kuptojnë që është një mënyrë për tu paraqitur ndryshe. Fajet e Bashës janë aq të rënda përballë qytetarëve saqë ai vetë sot e gjithë ditën ka frikë t’i takojë ata.
Do ishte më e ndërshme sikur Basha të kërkonte një ndjesë të madhe dhe mandej të thoshte që Dr.Kosova nuk do bëjë gabimet e tij, por jo. Njëlloj siç Basha nuk merrte me vete në takimet e tij në 2011 Berishën, sepse do i shkërrmoqte imazhin, njëlloj dhe sot Kosova mënjanon Bashën që të mos i ndodhë hataja. Pra edhe në fushatë e njëjta fiozofi, e njëjta frymë.
Si para dhe pas shpalljes së emrit, “fair play-n” e shkeli Partia Demokratike duke mos ju ndarë në asnjë moment sulmeve politike ndaj Veliajt. Populli thotë “ Aty ku ka pula bëhet shshshsht”, pra, për sa kohë Veliaj ka pasur një pozicion ministri dhe ka administruar mbi 35% të buxhetit, sado që gjithçka ka qenë transparente dhe gjithçka ka shkuar sipas çdo parashikimi në MMSR, opozita për hir të kapitalit politik sulmon.
Sulmet e PD-së në fakt nuk janë asnjëherë kundrejt reformave të bera nga Veliaj dhe pse ato kanë qenë shumë dhe plagë mbi 20 vjeçare. Sulmet kanë qenë në spekterin personal, duke tentuar të ngjizin idenë e njeriut jo të duhur për Tiranën.
Por, a nuk ka Partia Socialiste se me çfarë ta sulmojë poitikisht dhe ndoshta edhe ligjërisht Dr. Kosovën? Sigurisht që mjaftojnë ato që janë thënë e stërthënë në media ditët e fundit për “mikun zvicerian”, klinikën 2.6 mln euro të Kosovës, ilaçet e skaduara në maternitetin që ai drejtonte, krevatet që u zhdukën bashkë më Kosovën kur la Maternitetin, për të sulmuar gjithë ditën Kosovën.
Nga ana tjetër Partia Socialiste akoma nuk e ka shkelur “zotimin” e Veliajt për t’i qëndruar larg përbaltjes politike. Akoma nuk ka qoftë edhe një deklaratë të PS ose Veliajt kundrejt Kosovës.
Dy anët e medaljes “Kosova” janë katëripërisht të ndryshme. Ana “alla filozof” që bën qyfyre nëpër Tiranë është e kundërta e atij “Kosove” që sipas mediave, ka bërë jo pak zullume me paratë e shtetit e miltetit. Të bësh qyfyre me ata që s’kanë rrugë, kanalizime, ndriçim, ujë duke ju thënë se janë gjëra të lehta për tu bërë dhe pse kryetari i Partisë tëndë nuk i bëri 4 vjet, është më shumë tallje me popullin sesa seriozitet ndaj garës.
Premtimi i Kosovës që do kishte një fushatë pozitive është shkelur të nesërmen e ditës që ai e premtoi. Për sa kohë partia e tij çdo ditë merret edhe me modelin e flokëve të Veliajt, kandidati Kosova e ka shkelur këtë premtim. Akuzat që mund të hidhen ndaj Kosovës janë minimalisht të rënda që ai nuk duhet të dalë as në rrugë përballë qytetarëve, ndaj kursimi që po i bën Partia Socialiste nuk duhet të shihet si mungesë ndershmërie nëse i thonë mediat.
Për sa kohë “premtuesi” nuk mban fjalën e parë të nderit, nuk mund të ndërtojë as poçat natën, as s’mund të bëjë magji me “sekretet” që ai thotë se ka. Ëngjëlli në këndet e qyfyreve me qytetarët dhe djalli në letrat e shtetit, nuk besohet!
